Shillong, Nailur 19
Ka Sorkar Jylla ka la ai sngewbha haduh 15 akar ka jaka ha Mawkhanu sha ka NorthEast United FC na ka bynta ban seng ïa ka shlem ai jinghikai phutbol ha kane ka Jylla.
Haba pynpaw sha ki lad pathai khubor ha ka Sngi Palei, u CEO ka NorthEast United u Mandar Tamhane u la pynpaw ba ym pat ju lap ha ki jylla jong ka ri India ban ïoh ïa kum kine ki lad jingïarap kumba ka Meghalaya ka la leh na ka bynta ban kyntiew ïa ka jingïalehkai phutbol. “Nalor ka jingkyrshan lyngba ka tnat jngohkai, ngi la ïoh jingïarap ruh na ka Sorkar Meghalaya da ka jaka kaba 15 akar na ka bynta ban tei ïa ka shlem ai jinghikai.”
U la ïathuh ba katei ka jaka yn sa aiti sha ka NEUFC ha u Kyllalyngkot lane Rymphang jong u snem 2025 khnang ban sdang pynbha ïa ka. “Ka jaka kam long kaba madan, hynrei donkam ban pynmadan ïa ka khnang ba yn lah ban pynlong ïa ka prokram ïalehkai. Kumta kane ka jingpynbha ka lah ban shipor kumba shi snem ha shwa ban sdang ïa ka shlem ai jinghikai.
