Khliehriat, Nailur 19
Ka lympung ïalehkai Third Division Football Tournament ba la pynïaid da ka East Jaiñtia Hills District Football Association (EJHDFA) ka la nangjam shaphrang ha madan Artificial Turf kaba ha Deinshynrum, Khliehriat.
Ha kane ka jingïakhun kaba ka long ha ka Sng Palei, ka Dkhiah East SC ka la pynliem noh ïa ka Mookympad SSCC da 3-0 kol. Ïa kine ki kol la thep da u Mihlang Sutnga ha ka minit kaba 52 bad ar tylli kiwei pat la thep da u Diwano Nongtdu (58 & 63).
Ha ka jingïalehkai kaba bud, ka jingïakhun hapdeng ka Umtyra YWSC pyrshah ïa ka Nongsning Youth SSC ka la kut ha ka jingïakhaid hadien ba kim shym lah ban thep kol.
Ha ka jingïalehkai kaba khatduh jong kane ka sngi hapdeng ka Umlawang SC pyrshah ïa ka Moopala SC ka la kut ha ka jingïakhaid mar 2-2 kol. Na ka Umlawang la thep da u Lionel Dkhar ha ka minit kaba 14 bad Premus Dkhar (45), katba na ka Moopala SC la thep da u Elohim Nongtdu (16) bad u January Pajuh (33).
