Khliehriat, Nailur 20
Ka Nongthymme SC, Moopyniein SCSO bad Tuberkmai shnong CSC ki la ïoh jingjop ha ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA).
Ha ka jingïalehkai kaba la long ha madan Deiñshynrum, Khliehriat ha ka 20 tarik Nailur, ka Nongthymme SC ka la pynliem da 2-1 ïa ka Teilang SSC Lummyrli.
Ïa ki kol jong ka Nongthymme la thep da u Ebormi Sympli 37 bad u Pyrshang Dkhar ha ka minit kaba 52, katba ka Lummyrli ka la ïoh ban thep kol ha ka minit kaba 61 lyngba u Moses Manner.
Ha ka jingïalehkai kaba bud, ka Moopyniein SCSO ka la pynliem da 2-0 ïa ka Seiñ Khynroo SSC Umsatai bad ïa kine ki kol jong ka Moopyniein la thep da u Ha-o-arki Siangshai ha ka minit kaba 24 & 66.
Ha ka jingïakhun kaba khatduh jong kane ka sngi, ka Tuberkmai shnong CSC ka la pynliem da 3-1 ïa ka Cham Cham SSC.
Ïa ki kol jong ka Tuberkmai shnong la thep da u Juhki Kyndait ha ka minit kaba 23 bad u Coming Dkhar ha ka minit kaba 56 bad Kirat Phawa ha ka minit kaba 74, katba ka kol jong ka Cham Cham la thep da u Wikries Phawa ha ka minit kaba 51.
Mynta ka sngi ka jingïakhun Quarter Final jong ka 2nd Division kan long hapdeng ka Umlangsha Youth SSC pyrshah ïa ka Ladrymbai Dongwah SWSC ha ka por 12.30 baje mynsngi, ka Rymbai Madanpynriang pyrshah ïa ka Lumputhoi SC ha ka por 3.00 baje nohphai sngi.
