U Nongsaiñ Hima, 1983
LANO, HANGNO, MANO, KUMNO, SHANO, bad BALEI ki long ki hynriew tylli ki Ktien kiba dei ban ïalang lok bha. Khlem kine ngin ym lah ban long kiba janai ha ka jingtip jingnang bad ka jingïaid shaphrang jong ngi kaba man la ka sngi. Lyngba ki khmat bad ki shkor jong ngi, ngi iohi bad ngi iohsgnew bad kita kiba ngi iohi bad iohsngew ki leit sha ka ja-bieng. Kumta lada ha ka jabieng jong ngi ngim jiar ïa ka jingiohi bad jingiohsngew jong ngi da kitei ki paralok, khlem pep kata ka jingiohi bad jingiohsngew jong ngi, kan ym long kaba pura bad janai.
Hangne ngi ïapher bak lybak na ki mrad hynrei wat ki mrad ruh ki don ka jingsngewthuh bad ka sap ba la ai U Blei shaphang kane. Ki tip uno u phlang uba long dawai bad uno uba long bih.Kumjuh ruh ki tip bad sngewthuh na ka jignsma mano ba don bad mano bym don khnang ba ki lah ban kiar, ioh ki iap ei.
Kumba shu pyni nuksa, ki nongsiat hati da lei lei kin ym ïeng ha ka jaka ba ka lyer ka beh shaphang u hati uba ki thwiat namar ka lyer ka rah ïa ka jingsma briew bad uta u hati un phet bad rieh noh ne u lah ba wan da lyndet ban ïaleh bad u briew. Kine ki long ki jingshisha kiba ngim dei ban shu tharai jem ia ki hynrei ban puson bad pyrkhat khyndiat.
Kitei ki hynriew ki paralok kiba ngi dei ban ïalang lok man la ka khyllipmat ki lok kiba shisha bad wei ba ngi la pynmlien ban ïalang lok bad ki, ngi ruh ngin mlien ban kynmaw bad ngin ioh jingïarap, ma ki ruh da ka jingïalang jong ngi bad ki kin ym iehnoh ïa ngi bad kin ïarap ïa ngi ban sot bad iap ïa ka jingshisha ka ban ïalam ia ngi sha ka lynti kaba dei.
Ki Khasi jong ngi hyndai ki don ki jingong ban pynkynmaw ïa ngi ïa ka jingdonkam ba ngi dei ban ïalanglok bad kitei ki hynriew ki Ktien. Ki ong – Wat ju bam ja khluid ioh phi hap khlei noh, da peit shwa ba phin ryngkoh wat ju nguid ïa la ka prie kum u ksew bad kumta ter ter. Ki don ki jingshisha kiba khraw kiba pyni ba ïa kitei ki 6 ki Ktien kiba ngi dei ban ïalang lok bha ki long kiba donkam ha ka jingim jong ngi kiba man la ka sngi, da kaba ngi im ka jingim kaba ngi da tohkit da wad da kylli kan ïarap ban tei ia ka longbriew manbriew jong ngi bad kano kano ka kam ba ngi trei kan sei soh kan phuh kan phieng.
Ki Khasi ki sin u Kyndang Kwah ïa u briew ne ka briew kiba kmen shongshit toh – hoh ha ka jingkular ne jingpynshngain jong kiwei pat ba kin ioh eiei, hynrei khlem da ioh. U Phan – ew la sin ïa u ne ka briew kiba shu mynjur bieit katba ong kiwei wat ïa ka ñia manla ruh, na lade phi lili pen – pen ka pyrkhat – pyrdain.
U Balia Siang – Sdieh la sin ïa ki briew kiba leh mynleh banang batip haphang haphang ban batai stad ïa kiei kiei.
Ka jingroi jong ka jaidbynriew bad ka ri ka shong ym ha ka rongphong kaba tang na sla bad lada ka long kumne ka jaidbynriew kan ym lah san lah roi, hynrei dei ka jingwad bad jingngam jylliew ïa kiei kiei baroh bad ka jingtrei minot da la ka jingmut baroh yn lah ban tei iaka ri bad ka jaidbynriew.
