Guwahati, Nailur:
U nongïalam jong ka seng Bharatiya Janata Party (BJP) ha Sonari jong ka Charaideo, Assam, u la shah pynshisha ba u la ïap da kaba shim hi ïa la ka jingim hynnin ka sngi. Kumba la ïathuh ka tyllong khubor, la ong ba ïa une uba la ïap la tip kyrteng kum u Debajit Hazarika. Kumba la pynshisha, la ong ba u la shim ïa kane ka rai hadien ba u la sngewthuh ba u la shah kynnoh bym hok bad ïalam bakla ïa ka longïing jong u.
U Hazarika u la buh ïa kawei ka shithi kaba la kynnoh ba uwei na ki nongthoh khubor u la donkti na sha lyndet ha ka ban pynlong ïa u ba un shim da kane ka lynti ha kaba u la hap ban pyndkut noh ïa la ka jingim. Ha ka shithi, u la pynshisha ba une u nongthoh khubor u la pynshitom ïa ki jingmut jingpyrkhat jong u.
U Hazarika u la shah kynnoh ba u la donkti ha ka jingpyndonkam bakla ïa ka pisa. Ka kurim jong u ka Mousumi Hazarika ka la ïathuh ha ki nongthoh khubor ba u kurim jong ka um ju donkti ei ei ha ki kam klop tyngka kumba la kynnoh da ki katto katne ngut ki briew. Ka la pynshisha da kaba ong ba u Debajit Hazarika u la long u lanot jong ki katto katne ki nongïasuhbuit sniew. Ka la ong ruh ba une u briew u trei bha ha ka imlang ka sahlang bad um ju donkti ha ka ban bam klop.
Na ka liang jong ka, ka la suba ba kane kam dei kaba u la shim hi ïala kajong ka jingim, hynrei la don kiba pynïap ïa u, ka la dawa ba la dei ban pynlong da ka jingtohkit kaba bniah halor ka jingjia. Ïa ka metïap jong u la lap na Panchayat Office kaba don ha Sonari. Ka tyllong khubor ka la ïathuh ba ha kane ka shithi la pynpaw ïa ki kyrteng jong saw ngut ki briew.
