Shillong, Nailur 20
Ka Village Health Council (VHC) Jongksha, Mawkynrew Block, East Khasi Hills District hapoh jingïalam jong u Chairman Bah Ebidrian Khriem, ha ka Sngi Thohdieng ki la leit ban khang tala noh ïa ka Jongksha Public Health Centre (PHC) hadien ba ki ar ngut doktor ki la shim shuti naduh ka 14 tarik mynta u bnai kat haduh ba ïa ki nongpang kiba la leit shah sumar ki la hap ban phah leit noh sha ïing.
Katkum ka durkhih (video) ba la phah da ki nongïalam VHC Jongksha, u Bah Ebidrian Khriem u la ïathuh ba naduh ba ki doktor ki la shim shuti kata naduh ka 14 tarik mynta u bnai haba wan ki nongpang ki la shu shah beh namar bym don doktor.
“Kum ki nongshong shnong haba ïohi ïa ka jingeh kaba ki paidbah ki mad, haba wan sha ka PHC Jongksha kam don kano-kano ka bynta ban ai jingsumar ngi dap da ka jingsngewsih,” u la ong. U la ong kat bym pat don doktor hap ban khang shwa ïa ka PHC haduh ban da wan ki doktor.
U la pynpaw ka jingsngewsih namar ka Jongksha PHC ka don ar ngut ki doktor hynrei baroh ar ngut ki la shim shuti haduh 45 sngi hynrei ka sorkar ka khlem phah bujli da kiwei pat ki doktor.
Ha kane ka sngi la ai jingkren ruh da ka Kong Clarin Lyngdoh kaba dei ka President jong ka Village Organisation Jongksha kaba dei ruh ka dkhot VHC Jongksha, kaba la ïathuh haba ki la leit ban jurip ïa ka PHC ha ka 14 tarik mynta u bnai ki la lap ba ki kamra ki la thylli namar ki la shah beh lut namar bym don doktor ban sumar.
Ka la ïathuh ba kum ki paidbah ki la kyrpad ïa u Sordar jong ka shnong Jongksha hynrei haba u la thaw ki lad ki lynti ym shym la lah ban phah doktor sha Jongksha PHC.
Ka la ong ruh ba ki doktor ki don ka hok ban shim shuti haba ki donkam hynrei ka sorkar ka dei ban phah bujli da kiwei pat khnang ban lah ai jingsumar ïa ki nongpang.
Ka la ong biang ba wat haduh kane ka sngi ka 20 tarik mynta u bnai haba ka sorkar ka khlem phah doktor kum ki paidbah ki la wan khang noh ïa kane ka PHC bad yn sa plie ynda la phah doktor.
