Shillong, Nailur 20
U Myntri Rangbah ka Jylla u Conrad K Sangma u la pynkup burom ïa ki 8 ngut nongthoh khubor ba la kham rangbah ha ka Meghalaya Media Meet ba nyngkong eh, kum ka jingithuh ïa u synñiang u bynhei ba radbah jong ki sha ka kam thoh khubor ha kine 30 snem ba la leit.
Ha kane ka jingpynkup burom kaba la long ha ka Sngi Thohdieng ha Vivanta hotel, Shillong u la pynbna ban ai jingïarap ïa ki phra ngut nongthoh khubor kiba la shah pynkup burom kaba mar 1 lak tyngka lyngba ka jingïarap ba kyrpang na ka Chief Minister’s Special Grant.
Ha kane ka sngi la ïadonlang ka Kong Ampareen Lyngdoh kaba dei ka Myntri ba dei peit ïa ka tnad pathai khubor jong ka jylla ryngkat u Commissioner & Secretary ka tnad I&PR u Vijay Mantri bad u Director ka tnad I&PR u Malthus Sangma, ki nongthoh khubor ka jylla bad kiwei kiwei.
Haba ai jingkren ha kane ka jingïalang, u Conrad K Sangma u la ban jur ïa ka jingdonkam jong ka jingïatreilang hapdeng ka sorkar bad ki kot khubor ban wanrah ïa ka jingkylla ha ka imlang ka sahlang.
U la ong ba bun ki briew haba ki shu peit ki sngew ba ka suk bha ban thoh khubor hynrei kim tip ba kane ka kam, ka long kaba eh bha. Kumta u la ong ba donkam ban pynlong ka jingai jinghikai ïa ka kam thoh khubor man ka por bad ka donkam ruh ban ïaphylliew jingmut bad kiwei ki nongthoh khubor na kiwei ki jylla khnang ban dang lah ban pynjanai shuh shuh.
Shuh shuh u la pynpaw ba ha kine ki hynñiew snem ba u long kum u Myntri Rangbah u ju pule man ka por ïa ki kot khubor hynrei ki don ki por ba u shah kynthoh hynrei um sngew eiei namar ka dei ka kamram jong u ban pynjanai ïa ka jingtreikam.
U la ong biang, phi lah ban kylli, kaei ka kam ba phi la leh lada dei ha kam kum u Myntri Rangbah ne ha ka kam saiñ pyrthei hynrei kaba khatduh, “ngan ong ka dei ka jingshaniah”.
“Ngi lah ban pynlong ïa kiei kiei kiba sngewtynnad tang shipor hynrei ban pynneh ïa ka jingshaniah ka dei kaba ngi baroh ngi dei ban ïaleh katba lah ban don ïa ka thong katba ngi nang ïaid shakhmat bad nga ngeit skhem ba ka jingshaniah ka dei ka bynta kaba kongsan tam ha ka kam pathai khubor,” la ong shuh u Conrad.
Ki nongthoh khubor kiba la shah pynkup burom ki kynthup ïa u Bah Philip Marweiñ, Editor jong ka Youth Today, u Subroto Bhattacharjee u Bureau Chief ka UNI, Bah RM Shabong, u Editor jong U Rupang, Bah MM Thaiang, Editor jong U Yutip, u Manas Choudhury, Editor barim jong ka Shillong Times, u Sanat Chakraborty, u Independent Journalist, ka Linda Chhakchhuak, ka Independent Journalist, bad u Sanjib Bhattacharjee, u nongshongdur jong ka Shillong Times.
