Nongstoiñ, Nailur 20
Ka kynhun ïalehkai jong ka Shidus FT ka la ïoh ïa ka jingjop bad rung ruh sha ka quarter final jong ka lympung ïalehkai phutbol ba la tip kum ka 1st knockout open to all football tournament 2024 ïa kaba la pynlong da ka IATREILANG Group Nongsohpian West Khasi Hills kaba la jam mynta sha ka kylla 16.
Haba phai sha katei ka lympung ïalehkai ka nam tam bad ka nam jong jong ka Shidus FT ka la wan hadien ba ka la lah ban pynliem noh da 5-4 kol ïa ka Mawïawet SC lyngba ka jingïashut tie breaker hadien ka jingïakhaid khlem da don mano-mano ba ïoh ban thep kol ha ka jingïalehkai pyrshah ha ka sngi sdang ïa ka kylla 16 kaba la long ha ka sngi thohdieng jong ka taïew ha madan Shnong Nongsohpian West Khasi Hills .
Katei ka jingjop jong ka Shidus FT ha katei ka sngi ka la pynlong ïa kane ka kynhun ba kan ïoh buh jaka ïalade sha ka jingïalehkai quarter final jong katei ka lympung.
Na ka liang ka tournament commitee jong katei ka lympung ka la pyntip ba ka jingïalehkai jong ka kylla 16 jong katei ka lympung kan long biang ha la 21 tarik mynta u bnai ha kajuh ka madan ïalehkai .
Shuh shuh ki la pyntip ruh ba ka jingïalehkai jong ka kylla 16 ha ka 21 tarik mynta u bnai ha ka por 10.00 mynstep kan long hapdeng ka Mawrok porsohsat Jr pyrshah ïa ka Tiehsynniangoin SC, ha ka por 12.30 mynsngi ka jingïalehkai kan long hapdeng ka Marlok FT pyrshah ïa ka Ehrngiew SC katba ha ka por 2.30 noh phai sngi ka jingïalehkai kan long hapdeng ka Kyrsiewthiah SC pyrshah ïa ka 4th MLP Sohpian.
