Shillong, Nailur 20
Ka Meghalaya Pradesh Congress Committee (MPCC) ka la rai ban sei beit da ki kyrtong kiba phah lyngba ki Block Congress Committee haba jied ïa ki kyrteng ki nongïakhun ha ka ilekshon ban jied thymmai ïa ki Member of District Council (MDC).
U President ka MPCC, u Bah Vincent H Pala u la ong ba ka Congress ka treikam na shapoh shalor ban pynkhlaiñ ïa ka seng bad ka don ka kynhun kaba khlaiñ wat ha kito ki konstitwensi kiba ki MLA ki la phet sha kawei pat ka seng.
U la ong ba ki nongtrei ka seng kim duh mynsiem bad kin nang trei shitom ban pynkhreh ïa ka ilekshon MDC.
Kumta u la ong ba la bthah ïa ki Block Congress Committee ban nang phah lypa ïa ki kyrteng jong ki kyrtong kiba dei ban ïakhun ïa ka ilekshon MDC bad la rai ruh ba ki Block ki dei ban ai jingmut lypa mano kiba kham biang ban long ki kyrtong.
Hynrei u Bah Pala u la ong tang ha kito ki konstitwensi kiba ki Block kim lah ban rai ïa ki kyrtong yn sa shim rai na shalor.
U nongïalam ka AICC u Matthew Anthony uba dei u Joint Secretary, u la ong ba ka Congress ka pynïar ïa ka rukom treikam da kaba phai sha ki samla la ka dei ha sor ne nongkyndong bad lyngba jong ki yn phaikhmat ban thaw ki lad ban kyntiew ïa ka ïoh ka kot jong ki nongshong shnong.
U la ong ba ka seng ka la shim lypa ruh ïa ki sienjam ki ban long kum ki jingkdew ne ïohi jngai na ka bynta u snem 2028.Ha kawei pat ka liang, u Bah Pala u la ther kylla ïa kito ki MLA kiba mynshwa kiba kynnoh ïa ka jinglong nongïalam jong u hadien ba ki la phet na Congress.
U Bah Pala u la pynpaw ïa kane haba kylli halor ki jingkynnoh ba ka Congress ka nang tlot bad bun ki MLA ki phet noh ha ka por jong u kum nongïalam.
“Ngam dei uba rhah ban bat sah kum u President tangba ngam dei ruh uba pyndem. Nga la ong ïa ki nongïalam ka AICC bad donkam ban bujli hynrei ki ong ïa nga ym donkam ban pyrkhat ïa kata namar ka seng ka donkam ïa ki briew kiba ïai neh,” u la ong.
U la ong ba kito ki MLA kiba la phet noh na ka Congress ki pyrshang ban ai daw bad kynnoh ïa u kum u President, hynrei wat napdeng kito ki 12 ngut ki MLA kiba phet sha ka TMC, katno ngut ki neh bad kato ka seng.
“Ki don ki MLA kiba leit sha ka UDP, BJP bad ki don lei-lei kiba phet seng lai sien saw sien tang hapoh shisnem. Kumno kum kita kin kynnoh ïa nga haba ïalade ruh kim long kiba ïai neh. Haba ngi don ha ka seng ngi hap ban ïakhun ïa ki jingeh bad kum u nongïalam ngam dei uba rhah tangba ngam dei ruh uba shu pyndem ne shu shahjem,” la ong u Bah Pala
