New Delhi, Nailur:
U nongmihkhmat ka China sha India, u Xu Feihong ha ka Sngi Palei u la ong ba ka China bad India ki long ki ar tylli ki ri kiba dang kiew shaphrang bha ha kane ka juk ba mynta bad baroh ar ki don ïa ka jingkitkhlieh ban kyntiew ïa ka bha- ka miat jong ki paidbah. Ia kane utei u heh u la kren da kaba kdew ruh ia ki jingiadei kam bad jingiasngewthuh jingmut hapdeng u nongialam ka China- u Xi Jinping bad u Myntri Rangbahduh ka ri India- u Narendra Modi ha ki jingiakynduh jongki na ka por- sha ka por tad haduh kine ki sngi.
Kumta, utei u heh u la ong ruh ba ka China bad ka India ki dei ki ar tylli ki ri kiba heh tam bad kiba dang kiew ha ka pyrthei. Baroh arliang ri ki don ia ka jingkitkhlieh ba kongsan ban kyntiew ia ka ioh ka kot bad ban kyntiew ia ka jinglong- jingman bad ka bha- ka miat jong ki paidbah nongshong shnong jongki. U Feihong u la kdew ruh ia ki snem ba ka India bad ka China ki la iatrei lang bad kumta ruh u la ong ba ka China bad ka India ki la don ka jingiatreilang kaba jan bha – naduh ki snem 1950 bad baroh arliang ri hi ki la buh ia ki phra tylli ki nongrim jong ka jingiashongsuk, kiba la kylla long ki aiñ ba kongsan jong ka pyrthei.
Shwa ia kane, haba kren ha ka jingialang ha katei ka sngi, u nongmihkhmat jong ka China u la ong ba ka India ka dang pyntreikam ia ki jingthmu kum ka “Atmanirbhar Bharat (Self-Reliant India)” bad “Make in India” bad ka angnud ban long ka nongkhaïi kaba heh tam ha ka pyrthei.
Utei u nongmihkhmat jong ka China u la ong ba naduh ki snem 1990, ka India ka la trei shitom bad ialeh tyngeh ban pynkylla dur ia ka jinglong -jingman bad khamtam eh ha ka ioh ka kot bad ka imlang sahlang.
U Xu Feihong u la ong ruh ba ha ka jingialang kaba rakhe ia ka jingdap 70 snem jong ki san tylli ki nongrim jong ka shongsuk- shongsain, u President Xi Jinping u la pynpaw biang ba ka jingkut jingmut jong ka China ban neh ha ka lynti jong ka roi ka par kaba suk kan nym kylla.
Une u nongmihkhmat jong ka China u la ong ba kumba ka long mynta, ka jingiadei hapdeng ka China bad ka India ka don ha ka kyrdan kaba skhem bad kaba hajrong duh bad kumta ruh la ngeit skhem ba kane ka jingiatrei lang jong baroh arliang ri kan nang pynbha bad pynroi ia ki kam ki jam ym tang ha kine ki ar tylli ki ri hynrei wat sha ka pyrthei baroh kawei.
Ka India bad ka China ki dep ban pynlong ia ka jingialang kaba 31 jong ka Working Mechanism for Consultation & Coordination on India-China Border Affairs (WMCC) ha ka 29 tarik Nailar hapoh ka nongbah Beijing jong ka China hi.
Namarkata, la ong ba kine ki arliang mamla ki la don ka jingïakren kaba shai, kaba la khmih lynti ruh ba kan ïaid shakhmat halor ka jinglong jingman ha shilynter ka Line of Actual Control (LAC) ban pynduna ïa ki jingïapher jingmut bad ban wad lad kumno ban pynbeit noh kloi ïa ki mat kiba dang sahteng bad ki la mynjur ban ïakren kham jur lyngba ki jingïadei bad ki kam shipai.
Ha ka bynta ba khatduh jong ka jingkren jong u, utei u nongialam ka China u la ong ba baroh arliang mamla ki la rai ban ïatreilang ban pynneh pynsah ïa ka jingsuk bad jingshngaiñ khamtam ha ki jaka khappud katkum ki jingïateh kular, ki protocol bad ki jingïasngewthuh jingmut ba ïadei hapdeng ki arliang mamla.
