Khliehriat, Nailur 22
Ka Ladrymbai Dongwah SC bad Rymbai Madanpyn -riang SC ki la kiew kyrdan sha ka First Division bad kin ïoh ïashim bynta naduh ka samoi ïalehkai kaba thymmai jong u snem ban wan.
Kane ka la wan urlong lyngba ka jinglah ban ïalehkai bha ha ka Second Division mynta ka aïom ba la pynïaid da ka East Jaiñtia Hills District Football Association.
Haba phai sha ka jingïalehkai ha ka Sngi Saitjaiñ, u Obadaïa Bareh u la ïoh hat-trick bad pynlong ïa ka Rymbai Madanpynriang SC ba kan thep kol haduh 9-0 pyrshah ïa ka Lumputhoi SC.
Shwa kane, ka Ladrymbai Dongwah SC ka la jop ïa ka Umlyngsha Youth SSC lyngba ka tie-breaker da 3-2 kol hadien ba kim shym la lah ban thep kol.
