Shillong, Nailur 22
Ka Pyndengumïong District Sports Association ka la lah ban bat ïa ka kyrdan ba-ar ha ka Zone-D U-16 bad ruh ban ïoh jaka sha ka quarter-final jong ka Meghalaya Youth League 2024 ba la pynïaid da ka Meghalaya Football Association.
Shwa ka jingïakhun ha ka Sngi Saitjaiñ, ka Eastern Border Sports Association ka la ïoh ban bat ïa ka kyrdan ba-ar ha ka U-16, hynrei da ka jingshah rem noh ha ka Pyndengumïong da 2-0 kol ka la pynlong pat ban hiar noh sha ka kyrdan balai. Ka Mawshynrut SA ka la pynliem ïa ka Mawkyrwat DSA da 1-0 kol na ka bynta ban wan ha ka kyrdan basaw.
Ha ka U-14, ka Nongstoiñ bad ka Pyndengumïong ki la dep ban pynthikna ïalade ban rung sha ka quarter-final shwa ka jingïakhun hynnin ka sngi. Ha kane ka jingïakhun kaba khatduh, ka Nongstoiñ ka la jop da 8-0 kol ïa ka Tyrsad ASA. Katba ka Pyndengumïong ka la ïakhaid khlem don ba thep kol pyrshah ïa ka Easter Border bad ka Mawkyrwat ka la pynliem ïa ka Mawshynrut da 3-0 kol.
Ha ka Zone-B, ka West Jaiñtia DSA ka la jop da 3-0 kol ïa ka Saipung BSA bad ka Amlarem BSA ka la pynliem ïa ka East Jaiñtia DFA da 4-0 kol.
Ha ka U-16, ka West Jaiñtia ka la jop da 7-0 kol ïa ka Saipung, katba ka Amlarem ka la pynliem ïa ka East Jaiñtia da 3-0 kol. Kumta ka WJDSA bad ka Amlarem ki la wan ha ka kyrdan ba nyngkong bad ba-ar. Kine ki kynhun ki la wan kumjuh ha ka U-16.
Ha ka Zone-C la sakhi ïa ar tylli ki jingjop jong ka Shillong Sports Association pyrshah ïa ka Riwar Mihngi Football Association da 11-0 kol ha U-14 bad 6-1 kol ha ka U-16. Kumjuh ka kynhun Western Ri-Bhoi SA ka la jop da 4-1 kol ïa ka Sohra Sports Association.
Namar ba la hap ban pynkynriah noh ïa katto-katne ki jingïalehkai ha kane ka zone, ka jingïalehkai kaba khatduh jong ka Zone-C yn pynlong noh ha ka 28 mynta u bnai. Kumta ka Ri-Bhoi DSA (ka bym shym la ïalehkai ha kane ka taïew) bad ka Shillong SA ki danghap ban ïakhun ban ïaknieh ïa ka kyrdan ba nyngkong.
Ha ka Zone-A kaba la long ha Garo Hills, la lah ban pyndep ïa baroh ki jingïalehkai ha kine ki khyndiat taïew ba la dep bad ki la pynkhreh na ka bynta ka quarter final kaba la thmu ban pynlong ha u bnai ban wan.
