Da u R. Peter Khongthah
Man la kawei pa kawei ka Jaidbynriew (community) ka don ha ka ïa ka thong (goal). Ban ïada ïalade ïa la u pud u sam (boundary), ïa ka jinglong trai halor ka khyndew ka shyiap (land ownership), ïa ka shongkha shongman, ka dustur ka riti (culture), ka niam ka rukom (deity), ka kamai ka kajih, ka ktien ka thylliej (Iinguistic), ka ïohkam ka ïohjam (employment), la thoh ka tar (literacy), ka roi ka par bad ban ïada ruh na ka jingwan tyllep u poiwir u mynder (influx), ki long ki katto katne ki jingialeh (struggles) kiba kham ha khmat eh. Ki ju ong ruh ba kano kano ka jaidbynriew kaba ïaleh (khih) ka dei ka Jaidbynriew kaba im. (a community that struggles, will survive).
Kumjuh ruh ha man la ki bynta jong ka jingïaleh jongngi, kum ka Jaidbynriew kaba tang shitroh eh, ïa kino kino ki mat (issues) kiba ktah ïa ka ïap ka im jongngi, bun sien hi ngi pyndonkam bakla noh na ka por sha ka por ia kine ki kyntien – “na ka bynta ka Ri bad ka Jaidbynriew.”Bad ngi pynlong langkñia ïa ka Ri bad ka Jaidbynriew ha ki bun ki rukom.
Bunsien ruh ba ki nongïalam (leaders) jong ngi ki pyrta jam ïa kitei ki kyntien shong-sbai shong rupa, hangta ruh ka jingjemdaw bad jem rngiew ka ri jong ngi (our native land) ka mang jur nangjur pynban. Shwa ba ngin kren ïa kitei ki kyntien kiba khia thew (reasonable), ngi khlem da khan da pynshong nongrim bha, la hato kitei ki ktien kiba ngi la khlei ha khmat u paidbah ki dei kiba ngi da khlei shisha naduh ka dohnud ne tang na shyntur ban shu padiah tang ban ïoh shim kabu (take advantage) ban pynpaw nam ïalade (populatise) ne wat ban shu pynbiej ïa u paidbah (politicize) khamtam ha ka por ilekshon.
Ha man ki khep ba ngi ju ïohsngew ïa u ne ka nongkren (speaker) ba pnah thylliej bha ba ki pyrta jam – na ka bynta ka Ri bad ka Jaidbynriew – ngi da sngew myllung (emotional) bad sngew shoh mynsiem (spiritual) haduh katta. Kitei ki kyntien jali jaum (Spicy words) ngi lah ban ong, na ki khleiñ la thang jwat la bam, ka la pynum hin ïa ka dohnud (innocent) u paidbah byllien. Dei hangne keiñ u paidbah u shah shet shukor noh, shah pynbiej da kumne da kumtai ha kita kiba kam ieid ri ieid Jaidbynriew, phewse dei pynban ki nongdie ri bad suri kup snieh langbrot. ki la klet noh syndon ïa kata ka ‘Ri’ bad ka ‘Jaidbynriew’ na ka bynta ka shuki bad ka buaid (lust for power).
Kitei ki ar kynhun haneng, ki dei kiba ju ïai kren bha man ka por ïa kine ki kyntien – “Na ka bynta ka ri bad ka Jaidbynriew” – Bunsien hi ki pyndonkam bakla (misused) ïa kitei ki kyntien na ka bynta ka jingïohnong shimet jong ki (selfish interests). Ha ka kyrteng ka ri bad ka “Jaidbynriew” ki nud ban shukor ïa u paidbah uba la pynlong briew manbriew ïa ki. Ynda ki la syaid ka pla bad ynda la ïoh ïa ka iktiar (power) kaba u paidbah u la pynkhamti (handover) ha ki, ki la klet syndon ïa la ka kamram ban leh kumba ki la kular ha khmat u paidbah.
Ngim lah ban len ïa ki jingshisha ba ki paidbah ka Bri u Hynñiewtrep Hynñiewskum ki la shah ïalam bakla jur na ka por sha ka por ha ki nongïalam kiba pynmih ïa kitei ki kyntien sbai kyntien rupa. Ki nud ban pynkylla langkñia bad diengshaindoh (victim) ïa ka Ri tang ban dap ban biang ïalade shimet bad kiba ha ïing ha sem. Ki ak ïalade kum ki nongïalam pynban ki lilam bad kum ki riew ieit Ri pynban ki die ïa ka Ri.
Ka long ruh ka jingshisha ba ha ki seng ne kynhun bapher bapher, ki nongïalam jong ki ki shim ba ka dei ka kabu (opportunity) kaba biang tam ïa ki (best platform) ban pynkhreh ïa lade ban long nongmihkhmat. Hynrei kumba la dep kdew shakhmat, ynda ki la ïoh ïa kane ka iktiar na u paidbah, pynban ki long da khongpong. U paidbah u nang khmih lynti bad ïoh jingkyrmen ba da ka jingrung jong ki ha ka saiñ hima sima ka jylla (state politics) kin lah ban wanrah ïa ki jingkylla (positive changes) bad ki jingmyntoi ha ki liang ba bun (all round development). Phew da khongpong pynban, kine ki juh ki briew ki long pynban ki nongpynkhyllem sorkar bad kiba shu heh sa tang ka kob ka sob khlem lah ban pynurlong (fulfilled) wat tang kawei na ki hajar tylli ki kular jong ki ruh. Ki long shisha kita ki khleiñ la thang bad jwat la bam. Haba shu sngap ïa ki jingkren (lecture) jong ki lyngba kita ki ktien jali jaum, te keiñ noh artat, imat la da theh um ha ka shang ruh kam liat shuh. Lada ngi phai sha u pud u sam ka jylla ruh, ngi ioh ba tang u Maieid Hopingstone Lyngdoh (bam kwai ha dwar u Blei) uba la ïeng ïakhun tang marwei hi (lone fighter) ha baroh shi lynter ka jinglong MLA jong u. Ym shym la don wat tang uwei ruh u /ka MLA Khasi – Jaiñtia jong ngi u ban ai lem ka kti ka mon ka kti ka diang (helping hand) ïa u Maieid ha ka jingïaleh jong u ban pynbeit noh ïa u pud u sam bad ka jylla Assam. Na kata ka daw, u Maieid u shu sah marwei ha ka jingïaleh (la kum u Robinhood hapdeng khlaw bah) bad dei na kane ka daw ruh lehse ba um kwah shuh ban leit kurim katba ym pat urlong ka jingthrang jong u.
Shisha ha kane ka jylla jongngi la bun sa tang ki politicians kiba shu i maiñ rangbah, hynrei ki reng mattah (politicians with no statesmanship). Haduh mynta hi, ñiar ba ngin dang ïohi ïa ki nongmihkhmat ki ban long kum u Maieid H. S. Lyngdoh, Bah Thranghok Rngad, Bah E. K. Mawlong, Bah B. B. Lyngdoh bad kiwei kiwei kiba la khlad noh lane ki ban shu ïajan bad u Bahdeng Robert Garnett Lyngdoh (Uba dang i palwan bha haduh mynta ruh).
Lah ban ong hangne ba na ka daw ka jingjakhlia eh ka saiñ hima sima ha ka jylla jongngi, ba u Bah deng um treh shuh ban dang wan phai biang (return) sha ka state po-litics. Na kata ka daw, ka jylla jongngi ka dang ïai sahdien sah (still backward) haduh mynta mynne ruh ba bun kki nongialam kiba don ha ki ïa ka jinglong statesmanship, kim treh shuh ban dang ïa don bynta (involve) ha ka synshar-khadar (political).
Dei na kane ka daw ruh, ba ba ka jingbym don ki nongïalam kiba tbit (leaders with statesmanship quality) ha ka jylla, kiba bun na ki jaka jong ngi ki Khasi – Pnar, ki la shah knieh (encroached) lut ha ka Assam. Lashai lada jia ba u Garo u la ïoh jylla la ka jong (Garo land) kaei ka ban jia ïa ki jaka jong ngi sha ki thaiñ West bad South West Khasi Hills District. Nga tharai kiba bun na ki kin sa kylla Achik land.
Bun na ngi, ngi la klet noh ruh ïa la ki paradoh para snam (Khasi – Pnar) kiba sah sha ki thaiñ Langpih, Block – I, Block – II bad kiwei kiwei ki shnong khappud bad ka Assam, kiba ju shah lehbeiñ bad shah leh tohmet (tortured) ha ki bun rukom na ka por sha ka por ha ki Nepali, lehnoh Karbi ne wat ha ki bor aiñ ka Assam (Assam police). Ngi la ïakmen tohhoh ba ngi la ïoh jylla pura la ka jong (statehood), hynrei haduh mynta ruh ngim pat tip ïa la u pud u sam (boundary) u sdang naei bad u kut shaei.
Lada ngi phai dien biang (remind) ban ïanujor hapdeng ki nongïalam sengbhalang kiba mynta bad kiba ha shwa (NGOs leaders then and now) yn ym don shuh hi ruh kum u Bah Bull N. Lyngdoh (Bam Kwai ha Dwar u Blei). Ngim ju kham ïohsngew than ba u Bah Bull un put turoi ïa kine ki kyntien – “Na ka bynta ka Ri bad ka Jaidbynriew” – hynrei u la trei tyngeh met bad mynsiem ban ïada ïa ngi na ka jingtyllep u mynder.
Kumba ka long hi haduh mynta, ym pat don hi ruh napdeng ki spah ngut ki nongïalam seng ki ban shu ïajan malu-mala ka jingshlur bad u Bah Bull. Kiba bun na kine ki shu long kum ki “ksew pyndem tdong” bad shu byrngem kum u ‘laren khlem da dun slap’ kin don kiba ong ba ha ka por u Bah Bull, ka ‘situation’ ka ïahap ban leh kumto, hynrei mynta pat kam ïadei shuh. Hynrei ka jingshisha hi ka long ba mano napdeng jong ki u ban nud ban pha ïa la ka jingim (sacrifice one’s life) na ka bynta ka Ri, kumba la leh da utei u radbah jong ngi.
Kaba ijli eh ban peit ka long ba don napdeng kine ki nongïalam seng (watla ym baroh) kiba shu pyrta khleh bieit na ka bynta ka Ri bad ka Jaidbynriew, hynrei ynda la dap ka pla ki sngap noh pat jar, bad ynda la sdang thylli (empty pockets) ki sdang pynkhih biang. Ki paidbah jong ka Ri ki dei ban bishar bad khmih ïit bha kum ïa kine ki jait nongïalam seng namar kan shu long lehnoh ei lut pynban ia ka por bad ka bor jong ki (wastage of time and energy) haba ai jingkyrshan ïa ki.
U Bah Bull u la long shisha u Radbah bad u Satarbah (iron man) nalor u Tirot Sing, u Kiang Nangbah bad u Wickliffe Syiem, ba ka Jaidbynriew Hynñiewtrep jong ngi ka la pynmih. Imslem Bah Bull, Im Slem ki Riewshlur ka Ri jong ngi. U Blei ka jingsuk Un ai ha phi ka jingjahthait bymjukut jong ka Mynsiem.
Kyntang ïawai, kam myntoi ïa ngi kum ka Jaidbynriew, ba ngin leit buh syntiew man la ka por ïa kitei ki Riewkhraw jong ngi (na ba ioh kin diaw bad sngewsih noh pynban) haba ïa ki nuksa bad lynti ïaid ba ki la ai ha ngi, ngi lyndet noh ïa ki.
