Washington, Nailur:
Ki bor pynïaid ka US ki la lap ia ka met-iap jong uwei u heh ka tnat Embassy jong ka India uba la suba shah pyniap dusmon ha ka jaka sah jong u ha ki thaiñ ka mission hapoh jong ka nongbah Washington.
Katkum ka khubor jong ka tnat pathai khubor PTI, ki pulit jong katei ka nongbah bad ruh ka tnat Secret Service ha kane ka por ki dang tohkit bniah bad buddien ia katei ka jingjia ban lap ia ka daw tynrai halor ka jingiap utei briew kaba la jia ha ka Sngi Balang. Pynban ka tnat Embassy kam lah ban pyntikna la katei ka jingjia kan dei ka jingshah thombor ne ka jingleh hi dalade bad kumta ka jingtohkit kan dang ïaid sha khmat bad ia ki jingtip ba kham bniah yn sa lah ban pynshai ynda la pyndep ia ka jingtohkit bad jingwad bniah baroh.
Kumta, la ong ba ka tnat Embassy jong ka ri India kaba treikam bad kaba dei khmih ia ki jingdonkam jong ki nong India ha United States, ka la pyntikna ïa katei ka jingïap jong utei u heh ha ka jingpynbna paidbah ba la pyllait ha ka janmiet Sngi Thohdieng hynrei katei ka tnat ruh kam shym la ai jingpynshai ne iathuh bniah naba kim pat lah ban tip ia ka daw jong ka jingiap.
