Washington, Nailur:
Uwei u heh pulit uba la shah pynngat kyndon noh ha ka Sngi Palei halor ka jingshah pharep siat iap ia uwei u Nongbishar (Judge) na Kentucky hapdeng jong ka jingiania.
Ia u Mickey Stines la kem noh ha katei ka sngi na ka bynta ban tohkit bniah haba iadei bad katei ka jingkynnoh ba la ong ba u la dep ban siat iap ia utei u nongbishar hapdeng ka jingiania hapoh ka ophis treikam jong utei hi u nongbishar.
Kumta, la pynngat ruh ia u hapoh ki kyndon pynkheiñ aiñ jong ka jingpyniap briew.
U nongai-ktien jong ki pulit ha katei ka nongbah u la iathuh ba kane ka la jia hadieng ka jingiania kaba la jur hapdeng jong u Stines bad u Judge Kevin Mullins, uba la don 54 snem ka rta bad ka la jia ruh hapoh ka ophis treikam jong utei hi u nongbishar.
Wat la katta, ki pulit kim pat lap ia ka daw tynrai jong katei ka jingiania hapdeng utei u nongbishar bad u pulit bad kumta kin dang hap ban pynïaid shakhmat ia ka jingtohkit khnang ban lap ia ka daw bad ka duh ka dang jong katei ka jingjia baroh.
Ia kane ka jingjia la pyntikna da u Lat ka Kentucky- u Andy Beshear ha ka jingpynbna jong u lyngba ka rynsan ‘X’, kaba ju ia tip paidbah kum ka ‘Twitter’.
Wat la katta, la ong ba ki jingjia synreit kuli lane ki jingpyniap ki long ki bym sngew pher shuh hapoh US, namar ki don ruh ki thaiñ lane ki nongbah ba la bun da ki tiar siat ban ia u paidbah nongshong shnong.
Dang ha ki khyndiat por ba la leit jong une u bnai Nailur, uwei u runar u la siat pynmynsaw ia 5 ngut ki briew ha ka surok-bah jong ka Kentucky bad ia ka met jong utei uba siat ruh la ioh tam da ki pulit ha ka Sngi Balang hadien 10 sngi ba ki la wad bniah bad thwet ia u.
