Shillong, Nailur 22
Wat la u Bah Prestone Tynsong uba dei u Symbud Myntri Rangbah ka jylla bad MLA ka Pynursla Konstitwensi u la kham ïoh bor hadien ba u la mih na Apollo Hospital Delhi, hynrei ki doktor ki la bthah ban shong jahthait shwa shipor ha Meghalaya House, Delhi.
Haba ïoh ban ïakren bad u President ka NPP Pynursla Block, East Khasi Hills District Bah Emlin Khongstia, u la ïathuh ba u Bah Prestone u la kham khlaiñ tangba ki doktor ki la bthah ban sah shwa ha Delhi ban phah sumar kham bha.
U la ïathuh ba ka por ba ki leit ïakynduh ïa u ha Meghalaya House ha kine ki sngi, u Bah Prestone u la kham khlaiñ namar u la lah ban ïakren tangba ki doktor ki la bthah ïa u ban shong jahthait ha ïing kumba ar bnai eiei.
Katkum ki khubor ba la ïoh lum la ïathuh ba u Bah Prestone un hap ban sah shwa ha Meghalaya House namar ban pyndep ruh ban leit phah peit bniah biang ha ki doktor jong ka Apollo hospital namar ban wanphai biang sha Shillong bad leit biang sha Delhi kan ktah ïa ka koit ka khiah.
Shuh shuh la ïathuh ba ka jingbthah ïa u Bah Prestone ban shong shwa ha ïing kumba ar bnai ka long khnang ban ïoh bor haba la sumar na ki bynta ka khlieh. Ki nongïalam ka NPP ha Pynursla bad ha Meghalaya ki don jingkyrmen ba u Bah Prestone un ïoh bor noh khnang ba un lah ban shakri ïa ka jylla baroh kawei.
