Shillong, Nailur:
U Bah M Defenderson Shadap uba dei u Officer on Special Duty (OSD) ka Directorate of Food Processing ka Sorkar Meghalaya, u la ong ba ha ka prokram World Food India 2024 kaba la long ha Pragati Maidan ha New Delhi naduh ka 19 tarik Nailur bad ka ban sa kut ha ka 22 tarik, la sakhi ba kiba bun ki paidbah na kiwei ki jylla, ki kompani bad ki nongseng kam lajong kiba heh jong ka Ri India ki la ïaroh shikatdei eh ïa ki nongseng kam lajong napoh ka Jylla Meghalaya ha kaba ïadei bad ka rukom song ïa ki marbam bad ka jinglong jingman jong ki mar tynrai kiba la pynmih napoh ka Jylla.
Haba ïoh ban ïakren bad u Bah Shadap ha katei ka prokram, u la ïathuh ba ki don haduh kumba 21 tylli ki mar tynrai kiba ka Sorkar Meghalaya ka la wanrah ha ka World Food India 2024 ki dei kiba na ka ‘Meghalaya Pavilion’ ha kaba kiba kham bun ki mar tynrai ki dei napoh ka ‘Meghalaya Collectives” bad kine ki 21 tylli mar tynrai ki dei kiba la pynmih da ki nongseng kam lajong, ki Farmers Producer Organisations (FPO), Farmers Producer Companies (FPC), Meghalaya State Agriculture Marketing Board (MSAMB).
Kum ban shu kdew hangne, na ka liang ka Sorkar Jylla ka la pyllait paidbah ïa ka ‘Meghalaya Pavilion’ ha ryngkat ka jingpyllait paidbah ruh ïa ka ‘Meghalaya Collectives’ ïa kaba la pyllait ha ka World Food India 2024 ha Pragati Maidan ha New Delhi naduh ka 19 tarik Nailur bad ka ban sa pynkut pat ha ka 22 tarik Nailur 2024.
Ha katei ka sngi ka la don ruh ka jingïasoi ïa ka MoU hapdeng ka National Cooperatives of Organic Limited (NCOL) bad ka Meghalaya’s Natural and Organic Farming Society for Livelihood and Innovation in Agriculture (MEGNOLIA), kaba mihkhmat ïa ka Sorkar Meghalaya ban thaw ïa ka jingïatreilang bad kaba pynleit jingmut ha ka jingthied, ka jingpynïaid ïew, bad ka jingdie ïa ki mar organic na Meghalaya kaba la ïasoi hapdeng u Dr Vijay Kumar D, IAS, Commissioner & Secretary ka tnat ka rep ka riang bad ki nongrep ka sorkar Meghalaya, bad u Vipul Mittal Managing Director ka NCOL.
U Bah Shadap u la ong ba da ka jingpyllait paidbah ïa ka ‘Meghalaya Collectives’ kan plie lad-plie lynti ïa ki nongseng lajong ba kin don hapoh kawei ka kynhun khnang ba kin lah ban pynïaid ïew ïa ki mar jong ki shabar ka Jylla bad shabar ka Ri ruh kumjuh.
U Bah Shadap u la ong ba ka bynta jong ka ‘Food Processing’ ka long ban ïarap ïa ki nongrep bad ki nongseng kam lajong ba kin thaw ïa ki karkhana ban pynmih ïa ki jingbam.
“Naduh ba la seng ïa ka Directorate of Food Processing, ki la don bun ki skhim kiba na ka liang ka Directorate of Food Processing ka Sorkar Jylla bad na ka liang ka Sorkar Pdeng ki la pynmih na ka bynta ban ailad ïa ki nongseng kam lajong da kaba ïarap lyngba ki ‘subsidy’ lane ban ïarap ha ki rukom song ne ban ïarap ha ka ban thied ïa ki mashin bad ki jingdonkam na ka bynta ki nongseng kam lajong”, ong u Bah Shadap.
Shuh shuh u Bah Shadap u la ong ba lyngba kane ka rynsan kan ailad ïa ki nongrep bad ki nonseng kam lajong ha kaba ki lah ban wan pyninam bad wanrah ïa ki mar jong ki ha kane ka prokram.
”Kiba bun ruh ki nongpynïaid ïew kiba heh ki la wan ban kylli bad wad jingtip shuh-shuh ha ka ban ïoh ban thied ban pynïaid ïew ïa kine ki mar jong ki nongseng kam jong ngi”, ong u Bah Shadap.
Haba kylli kaei ka jingmyntoi kaba ki nongrep ne ki nongseng kam lajong napoh ka Jylla Meghalaya kin ïoh jingmyntoi ha ka jingsoi jong ka Sorkar Jylla ïa ka MoU hapdeng ka NCOL bad ka MEGNOLIA, u Bah Shadap u la ong ba ka jingmyntoi kaba ki nongrep ne ki nongseng kam lajong kiba pynmih ïa ki mar tynrai kin ïoh ka long ba kin ïoh ka lad ban die ïa ki mar jong ki shabar ka Jylla bad wat shabar Ri ruh kumjuh namar kumba ka long mynta, kiba bun ki nongrep bad ki nongseng kam lajong kiba pynmih ïa mar tynrai kim ïoh satia ka lad ka ïew kaba biang ban die ïa ki mar jong ki.
“Da kaba ngi ïoh ban ïakynduh ïa kine ki nongpynïaid ïew kiba heh ki ban shim ïa kine ki mar jong ngi ha ka kyrteng ka Meghalaya, ngi khmih lynti ba kine kiba pynmih ïa ki mar tynrai ki lah ban ïoh ïa ka dor kaba heh lyngba kane ka MoU kaba ngi la ïasoi”, bynrap u Bah Shadap.
