Jowai, Nailur:
Ban bishar bniah halor ka jinglong-jingman bad ka rukom long ka jingtei, u MLA ka Amlarem Bah Lahkmen Rymbui ha ka 20 tarik Nailur da lade u la hiar ban jurip ïa ka jingpyntrei ïa ka Eklavya Model Residential School (EMRS) kaba don ha ka shnong Umladkhur kaba hap hapoh ka Amlarem Sub Division, West Jaiñtia Hills District kaba ka jingpyntrei mynta ka la ïaid shaid-shaid.
Ïa ka jingtei jong kane ka skul la bei pisa da ka National Education Society for Tribal Students (NESTS), Ministry of Tribal Affairs jong ka Sorkar India ha ka jinglut kaba kot T.45 klur bad la pyntrei da ka kompeni WAPCOS Ltd na New Delhi.
Hadien ka jingjurip, u Bah Lahkmen u la ïathuh ba kumba long mynta ïa ka jingtei la dep ban pynïeng 5 tylli ki ïing paki (building) kynthup ka ïing paki jong ka ïing skul, ka jaka sah na ka bynta ki shynrang bad kynthei (na ka bynta 240 ngut ki khynnah), ka building Administrative, ka jaka sah jong ki nongtrei bad ki jingtei kiba dang sah ban pynïeng ki long ka building Warden bad Principal Quarter kumjuh ki madan ïalehkai bad kiwei kiwei ki jingtei.
U la ïathuh ba ïa ka jingtei la mang ban pyndep hapoh u Nohprah (December) 2025 hynrei na ki daw jong ka jingjur slap ha ki saw bnai ba la dep, ka lah ban shim por khyndiat bnai ban pyndep katkum ka jingmang, hynrei wat la katta u khmih lynti pat ba hapoh shisnem tam yn lah ban pyndep pura ïa ka jingtei.
“Kum u nongmihkhmat nga buh ïa kane ka kam kum kawei na kaba kongsan tam namar kan tei ïa ka lawei jong ki khynnah pule jong ka thaiñ”, la ong u Bah Lahkmen bad bynrap ba u don ka jingthrang ba kane ka Eklavya Model Residential School kaba don ha Umladkhur kan dei kawei na ki EMRS kaba nyngkong tam ban plie paidbah napdeng ki 38 tylli ki skul ERMS hapoh ka jylla.
U Bah Lahkmen u la ai khublei ïa ka Dorbar Shnong Umladkhur kaba la synñiang 15 akar ka jaka na ka bynta ban tei ïa kane ka skul kaba long ka jingmyntoi ïa ka thaiñ Amlarem Block.
Ha kaba ïadei bad ka jingtei ïa ki EMRS hapoh ka Jylla, u Bah Lahkmen u la ïathuh ba ha u snem 2018-2023 la mang kumba 38 tylli ki Ekalavya Model Residential School halor ka thong ban kyntiew ïa ka pule puthi hapdeng ki riewlum bad ban wanrah ïa ki ha kajuh ka kyrdan bad kiwei pat ki jaidbynriew.
