Ka jingïakhun pyrshah ïa ki nongkhaïi drok wat la ka long kaba jwat hynrei la ïohi ba ki pulit bad kumjuh ka HYC ki la ïakhun tyngeh ban ïoh kem ïa ki nongkhaïi drok la ka long ha nongbah Shillong ne shabar ba kynthup ïa ki trai bad ki bar jylla shynrang bad kynthei. Ym tang ba ki la ïoh kem ïa ki briew ba donkti, pynban ki la ïoh ban kurup ïa ki drok ba shongdor da ki phew lak tyngka. Ka long shisha ka jingjop bad ka jingnoh synñiang kaba heh sha ka jingïakhun pyrshah ïa u drok wat la ka thma pyrshah ïa u drok kam dei satia kaba jem, hynrei ka long kaba jwat haduh katta-katta. Kam dei kaba suk ban kem ïa ki nongkhaïi drok lymda la biang lypa ki nongai jingtip bad ka jingïatreilang hapdeng ki tnat bapher-bapher bad khamtam hapdeng ki pulit jong ki jylla bapher-bapher.
Kumba ngi ïohi mynta, jan baroh ki jylla ka thaiñ ki la sdang ban trei tyngeh pyrshah ïa u drok namar ki la pei shkor haduh katno u ktah ïa ki nongshong shnong. U drok, ym dei tang ba u ktah ïa u nongpyndonkam shimet, hynrei u ktah lut ïa ka ïing ka sem, ka shnong ka thaw, ka imlang-sahlang. Teng-teng ngi pyrkhat ba u drok u ktah tang ïa uwei. Hynrei lada ngam jylliew, ka jingktah ka kham ïar bad namarkata, sa mih bun ki jingeh. Ki nongpyndonkam drok kiba la kyrni bha, ki donkam ban ïoh drok man la ka sngi. Kim lah shuh ban ieh. Namarkata, ki don ki nongpyndonkam drok kiba ïaid da ka lynti jong ka tuh ka thiem ym tang na ki ïing ki sem jong kiwei, hynrei wat na ïing na sem lajong ban ïoh pisa ban thied drok. Lada kim ïoh drok, ka met ka phad jong ki kan mad ïa ka jingshitom. Dei na kane ka daw, ba ki nongdih drok kiba la snar bha kim lah shuh ban shah bad ki thom ïa ka sang ka ma tang ban ïoh ïa uei uba ki donkam.
Ki don da ki spah ngut kiba sah ha ki jaka sumar bad kiba pyrshang ban bthat noh ïa u kynjri jong ka jingkyrni namar ki la sngewthuh katno ka shitom ka met ka phad bad ka jingmut jingpyrkhat ym tang halade shimet, hynrei wat ïa ki baieid bathoiñ jong ki. Ki don ruh bun ngut kiba im hapdeng ka jingpang jingshitom kiba bun jait bun rukom namar ba ki la kyrni palat ha u drok. Tang kiba ïaid lyngba ki sngewthuh ïa u shiah ba thar bad kumno ka jingpang ka long. Ki don bun tylli ki longïing-longsem kiba la pynlut da ki lak tyngka ban pynïoh jingsumar ïa la ki khun ne ki bahaïng-bahasem kiba la ngat ha ka apot jong ka jingpyndonkam drok. Ban sumar ïa kiba la kyrni ha u drok, ka wan ha ka dor kaba rem bad namarkata, ka jinglut ka bun bah.
Ka por ka dawa ïa baroh ban long kiba husiar bad peitngor. Naduh na ïing haduh ha shnong ha thaw bad ruh ha ki shlem jingpule, dei ban ïa long kiba peitngor ïa la ki jong. Shisien ba la ïohi ïa kano-kano ka jingleh pher ha uno-uno ne kano-kano u ne ka khynnah/samla, dei ban ïasyllok noh mar-mar khlem da buh teng. Dei ban wad ïa ki daw jong ka jingleh pher ne ka jingkylla ha ka jinglong bad ha ka jingmut jingpyrkhat. Wat ap haduh ba ym lah shuh ban leh eiei. Pynlut ïa ka bor bad ka por ha ka ban pynbeit naduh ba sdang hashwa ban babe. Shim jingïarap na ki doktor ne ki bahaïng-bahasem ne ki paralok-parajor bad ban jingmut kumno ban sei ïa la ki khun ki kti na ka ahor jong ka jingpyndonkam drok. Lada lah ban leh eiei naduh basdang, ki jingeh ban mad hadien habud kin kham duna shibun.
Ryngkat bad ki pulit, ki shnong ki thaw, ki skul, kolej, skulbah bad baroh ki nongshong shnong ki dei ban ïatreilang. Ym don tang kawei ne ar kynhun ka ban lah ban ïakhun ïa kane ka jingeh bakhraw kaba kum ka jaitbynriew bad ka jylla ka mad. Wat ap haduh ba u drok un bam duh syndon ïa ki khynnah bad ki samla jong ngi kiba dei ka lawei jong ka pateng ban wan. Lada ngam jylliew, u drok u wanrah ïa kiba bun ki jingeh bad jingma ïa baroh. Wat ap haduh ba yn da don ki nongpyndonkam drok ha ïing ha sem. Wat ong ba tang kiwei kin ngat, nga te ngan lait. Long kiba husiar ïa la ki jong bad wat pynslem ban shim jingïarap nangne-nangtai. Ka patok ne byndi kam dei ka kut ka ban lah ban bthat ïa u kynjri jong ka jingshah teh mraw ha u drok. Ka patok ne byndi ka dei eh na ka bynta ki nongkhaïi drok kiba la riewspah da kaba pynsyrtok ïa kiwei. Na ka bynta ki nongpyndonkam ym ki nongkhaïi, ki donkam jingsumar met bad mynsiem. Ïatreilang na ka bynta ka lawei lym kumta ka jingjot ka la ap lypa ïa baroh, bad ïa kiba pyndonkam bad kumjuh ruh ïa ki bym pyndonkam drok.
