Jowai, Nailur 23
Ka Lumbhahdakha Wahïajer ka la pynjem khnap haduh 5-1 kol ïa ka Ïawmulong Nartiang na ka bynta ban ïoh jingjop ha ka 2nd Division Football Tournament-7th Debo Shullai Memorial Trophy ba la pynïaid da ka West Jaiñtia District Sports Association (WJDSA).
Ha kane ka jingïalehkai kaba la long ha Kiang Nangbah Stadium, Jowai ha ka Lah Sngi U Blei, u Rimiki Dhar u la ïoh ïa ka hat- trick da kaba ïoh thep kol ha ka minit kaba 16, 35 & 76. Ïa kiwei pat ki kol la bynrap da u Bernard Suchiang (22) bad u Augusteen Mukhim (42). Katba ïa ka shi kol jong ka Ïawmulong la thep da u Meker Pyrtuh ha ka minit kaba 79.
Haba phai sha kawei pat ka jingïakhun hapdeng ka Rising Sun Mukhla bad ka Shangpung Khliehmuchut ka la kut noh ha ka jingïakhaid hadien ba kim shym la lah ban thep kol.
Ka jingïalehkai ha ka Sngi Ba-ar kan long hapdeng ka Khliehmyntang Ïalong pyrshah ïa ka Panaliar ha ka por 12 baje, katba ka Lion Sports & Youth Affair ïa ka Shangpung Moosyiem ha ka por 2 baje nohphai sngi.
