Nongstoiñ, Nailur 23
U Donald Marthong uwei na ki heprit uba la don mynta ha ka shlem ai jinghikai jong ka Minerva Football Academy kaba don ha Punjab, u long uba don sap ym tang ha ka phutbol hynrei u don ruh ïa ka sap pynbiria, pynmih sur beat box, sap rwai, marathon ïa kaba la ong ba u la sdang ïa kane naduh mynba u dang don 6 snem.
Ïa kane la pynpaw da ki kmie ki kpa, kita ka Kong Daplin Marthong bad u Bah Franco Puweiñ haba kren bad u nongthoh khubor. “Ngi dap da ka jingsngewnguh ïa baroh na ka bynta ka jingkhublei kitbok kitrwiang ka jong phi ïa u khun jong ngi ba mynta u la don ha Punjab ban shah hikai ha ka Minerva Football Academy. Ngi ai khublei sngewnguh ïa ki khynnah skul ka Lurmangkara Secondary School Risiang, ki para klas, ki nonghikai, ki paidbah na ka thaiñ Maweit, kumjuh ïa ka shnong Risiang, Risiang Sports Club, ki nongpynïaid ïa ka grassroots jong ka West Khasi Hills, ïa ka shlem treikam jong ka DSO Nongstoiñ, ngi sngew ban ai khublei kyrpang ki lad pathai khubor ruh bad ïa u MLA barim u Bah Gigur Marthong” ong u Bah Franco.
Bah Franco u la ïathuh ruh ba u Donald u dei u khun ba hynñiew, kumba u paw ba don ka sap ha ka jingïalehkai phutbol naduh ba u dang 5 snem lyngba ka jingïarap jong i Kong Jidalin Tympuiñ bad Kong Daplin Marthong kiba dei ki coach hapoh shnong Risiang, Kumta u ïoh lad ban ïashim bynta ha ki lympung ïalehkai hapoh shnong ha Nongstoiñ bad ha Shillong ruh kumjuh ha ka rta kaba 8 snem haduh 10 snem.
Shuh shuh u la ïathuh ruh ba u la ïoh lad ruh ban leit sha ka jingpyrshang (trials) ha ka Shillong Lajong FC, bad ba khatduh u ïoh lad ban leit sha ka jingpyrshang jong ka Minerva Football Academy kaba la wan jied khynnah ha madan New Nongstoiñ bad u la shah khot noh syndon ban leit sha hikai sha Punjab.
U Bah Franco u la pynkynmaw ruh ba ha katei ka shlem ai jinghikai ka dei kaba la donlang ruh u Samborlang Rynjah (rangapkol na Mawryngkneng) bad u Mebakhamkhraw Nongrem.
“Ki sap ba paw jong u Donald u long kum ki jingpynbiria, pynmih sur beat box ha kaba u la sdang naduh ba u dang 7 snem ka rta, nalor ka sap rwai, marathon bad ïalehkai phutbol,” la bynrap u Bah Franco.
Na ka liang ki bahaïing-bahasem jong u Donald ki la kyntu ruh ïa kiwei pat ki kmie ki kpa ba kin long kiba bishar thuh ïa la ki jong ki khun namar U Blei u ai la ka jong ka sap, hynrei donkam ban ai jingkyrshan ïa ki khnang ba kin long kiba tyngshaiñ ha ka lawei ka ban wan bad ruh ba kin lait na ki jingsniew ba bun jait.
Ha kajuh ka por u la kyntu ruh ïa ka Sorkar Jylla ba kan shim khia kyrpang na ka bynta ban kyntiew ïa ka kam ïalehkai khamtam ban kner ki lad jingïarap na ka bynta ban sei ïa ki khynnah kiba kynsai napoh ka Jylla.
