Shillong, Nailur 24
Ka Hynñiewtrep Youths’ Council (HYC) ka la pynbeit ban pynlong da ka jingïalang ïamir jingmut haba ïadei bad ka jingjyllei jong u drok bad ka jingktah ïa ka imlang ka sahlang. Kane ka jingïalang la buh ban pynlong ha ka 28 tarik mynta u bnai ha Khasi National Dorbar Hall, Mawkhar naduh ka por 11:30 mynstep.
Ka HYC ka la dei kawei na ki seng kaba la trei shitom bad ïaid lynti mynta la jan shiteng snem tam ban peitngor bad pyrshang ban rat dyngkhong ïa ka jingkynrei jong u drok uba la suhthied ha kylleng ki thaiñ, ki shnong bad ki jaka ha kane ka Ri. La sakhi ba ka jingïoh lad jong une u jingdih pynbuaid (drok) ban ïoh rung ha ki shnong bad ki dong ka la pynjot ïa hajar ngut ki khun samla kynthei bad shynrang bad wat ki longkmie longkpa ruh kumjuh kaba la wanrah pat ïa ka shong syier bad jingma ïa ka shnong ka thaw bad ïa kiwei pat ki khun samla ki bym pat shym la ngop ha une u jingdih.
Kumta, na ka liang jong ka HYC da ka mynsiem kaba sngewkhia ka khot bad wer ïa baroh ki paradoh parasnam kiba sngewkhia halor kane ka bynta naduh ki Nongïalam Shnong, ki Seng Longkmie, ki Seng Samla, ki VDP, ki longkmie ki longkpa, ki khun samla, kiba hap hapoh ki shnong kiba don ha Sor Shillong bad khap sor (Shillong Agglomeration), ban ïa pyllait por khnang ban ïa wan sha katei ka jingïalang ïamir jingmut.
