Shillong, Nailur 24
Ka Mawryngkneng SC bad ka Mawpat SC ki la long ki ar tylli ki kynhun kiba la jam sha ka semi final ha ka lympung ïalehkai Third Division Football League 2024 ba la pynïaid da ka Shillong Sports Association.
Ha ka jingïakhun quarter final kaba la long ha ka sngi Ba-ar ha SSA Stadium, Polo, ka Mawryngkneng ka la pynliem noh ïa ka Lumparing SC da 1-0 kol bad ïa kane la thep da u Ïohbor Mukhim ha ka minit kaba 67.
Haba phai sha kawei pat ka jingïakhun kaba ar, ka Mawpat ka la pynliem noh ïa ka Kharang SC lyngba ka tie-breaker da 4-2 kol hadien ba ki la ïakhaid mar ar kol. Na ka Mawpat la thep da u Kardinuis Kharbangar (38) bad u Dikosta Nongrum (75), katba na ka Kharang la thep da u Firstborn john Marweiñ (21) bad u Riben G. Talang (72).
Kiwei pat ki jingïalehkai quarter final kin bteng ha ka sngi Balang ha kaba ka Umpling SC kan ïakhun pyrshah ïa ka Sanmer SC ha ka por 12:15, katba ka Tynring SC ïa ka Mawkriah West SC ha ka por 3 baje janmiet.
