Khliehriat, Nailur 25
Ka Wapung Shnong, Moolang SC bad Musniang Rim SC ki la ïoh jingjop ha ka lympung ïalehkai Third Division Football Tournament ba la pynïaid da ka East Jaiñtia Hills District Football Tournament.
Ha ka jingïalehkai kaba la long ha ka Sngi Balang ha madan Artificial Turf Deinshynrum kaba ha Khliehriat, ka Wapung Shnong ka la pynliem noh Tongseng Youth SSC lyngba ka tie-breaker da 4-3 kol hadien ba ba kim shym la lah ban pynkhih jar haduh kaab kut ka kynta ïalehkai.
Ha ka jingïalehkai kaba bud, ka Moolang SC ka la pynliem noh ïa ka Ïongkaluh Wahsder SC da 5-2 kol. U Faster Rymbai ula khyrwit da hat-trick hadien ba u la ïoh ban thep marwei haduh lai kol ha ka minit kaba 16, 67 & 80+2 bad bynrap sa ki artylli ki kol ba la thep da u Shibunlang Dkhar ha ka minit kaba 32 bad Lambres Dkhar haka minit 63. Katba ïa ki kol jong ka Ïongkaluh Wah-sder la thep da u Fastly Dkhar ha ka minit 22 bad u Diophrin Dkhar ha ka minit 72.
Ha ka jingïalehkai kaba khatduh jong kane ka sngi, ka Musniang Rim SC ka la pynliem noh da 2-1 kol ïa ka Suchen Lumiarain SC. Ïa ki kol jong ka Musniang la thep da u Miki Siangshai ha ka minit 63 bad Shanbormi Dkhar ha ka minit 79, katba na ka Suchen Lumiarain la thep da u Areyou Amse ha ka minit kaba 55.
