Shillong, Nailur 25
Ka Kynhun Myntri jong ka Sorkar Jylla ka la ai jingmynjur ban pyndonkam noh da ka ‘QR Code lane Quick Response Code’ ha ki bitor kyiad bad kane ka kan long kawei na ki lad ban khanglad ïa ka jinglait tuh ka khajna lyngba ka jingdie beaiñ ïa ka kyiad.
Ïa kane ka rai la ai jingmynjur ha ka jingïalang jong ka Kynhun Myntri kaba la long mynta ka sngi ka 25 tarik Nailur, 2024.
Haba kren sha ki lad pathai khubor, u Myntri Rangbah u Conrad K Sangma u la ong ba ka tnat Excise ka la leh ïa kane ban pyndonkam da ka ‘QR Code’ ha ki bitor khnang ban lah buddien ïa ka jingdie ïa ka kyiad bad ban tip lada don kano-kano ka jingdie beaiñ.
U la ong ba kane ka dei kawei ka lad ban khanglad ïa ka jinglait ei ka khajna bad kan long ka jingïohnong ha kaba yn lah ruh ban tip na kano ka dukan la thied ïa ka kyiad lane na kano ka jaka ki bitor kyiad ki wan bad shano yn pynpoi ïa ki.
Katkum ka jingong u Myntri Rangbah, da kaba buh ‘QR Code’ ha ki bitor, kan long ka jingïarap namar kan kham pynbha ïa ka jingïoh khajna ka tnat Excise da 5% haduh 10% bad kane kan long ka jingïohnong ïa ka Jylla.
Kum ban pynkynmaw, ka Sorkar ka la pyntreikam ruh ïa ka ‘hallogram’ kaba la ju tah ha ki bitor kyiad bad jingdih pyngngad kum ka beer bad kiwei.
