Shillong, Nailur 25
Ka India ka la ïoh jingjop ha kaba sdang ïa ka jingïakhun ha ka lympung ïaknieh jong ka AFC U20 Asian Cup China 2025, hadien ba ka la lah ban pynliem noh ïa ka Mongolia da 4-1 kol ha ka jingïakhun jong ka Group-G ha ka Sngi Balang ha Lao National Stadium KM16 kaba ha Vientiane, Laos.
Kane ka nam jop ka la wan urlong lyngba u Kelvin Singh Taorem, Manglenthang Kipgen bad u Korou Singh Thingujam na ka bynta ban pynlong ïa ka India ban ïoh lai point kiba nyngkong ha katei ka Group.
Kine ki kynhun ki la ïakhaid da 1-1 kol ha ka jingïakhun jong ka kylla step, hynrei ka India ka la ïakhun tyngeh ha ka kylla miet ha kaba ki rangïalehkai ka Mongolia kim shym la lah ban khanglad na ka jingshah thep.
Ha kane ka jingïakhun ka India ka la ïoh ban pynkhih jar nyngkong eh lyngba u Kelvin Singh ha ka minit kaba 20. Hynrei shwa ban kut ka jingïalehkai jong ka kylla step ka Mongolia ka la lah ban pynphai kylla lyngba u Temulen Uuganbat ha ka minit kaba 45 na ka bynta ban ïakhaid mar shi kol.
Hadien katto katne por ba la bteng ïa ka jingïakhun jong ka kylla miet, ka India ka la pyrshang ban ïakhun tyngeh ha kaba ka la ïoh ban thep biang ïa ka kol kaba ar ha ka minit kaba 51 lyngba u Manglenthang Kipgen. Hadien lai minit une u rangïalehkai shakhmat u la pynbud biang ïa ka kol kaba ar ka jong u. Hashwa ban wai ka India ka la thep biang ïa ka kol kaba saw lyngba u Korou Singh ha ka minit kaba 85 na ka bynta ban khur syndon ïa ka jingjop.
