Shillong, Nailur 25
Ka Manchester City ka la pynthikna ba u rangïalehkai shapdeng na Spain, u Rodri u la mynsaw ha ki bynta jong ka khohsiew ha ka jingïakhun pyrshah ïa ka Arsenal ha ka Sngi U Blei.
U Rodri u la shah bujli noh ha ka minit kaba 21 hadien ba u la mynsaw ha ki bynta jong ka khohsiew hadien ba u la ïatyngkhuh bad u Thomas Partey jong ka ka Arsenal.
Haduh mynta ym pat buh por ïa ka jingkoit ka jong utei u rangïalehkai, hynrei hadien ba la kut jong ka Carabao Cup pyrshah ïa ka Watford ha ka Sngi Ba-ar, u Pep Guardiola u la ong ba u la buh por ba u lah ban slem ka jingwan phai biang ka jong u sha ka jingïalehkai.
“Haduh mynta ngim pat lap ïa ka jingshitom kaba thikna jong u, hynrei u lah ban dang kham slem bha ban wanphai,” la ong utei u manager ka City.
“Ngi dangap ïa ka jingïakren bad ki doktor na ka bynta katei ka jingmynsaw ka jong u bad kaei ka jait jingsumar kaba u hap ban ïoh.”
U Rodri u la leit sha Spain ban ïoh ka jingshah sumar lyngba ki doktor ba kyrpang hadien ba la lah ban pyndep ïa ki test ha Manchester.
U Guardiola, u la ong ba utei u rangïalehkai ba 28 snem ka rta, u long u bym lah ban bujli. Ka City kam shym la shah rem satia ha ki 48 tylli ki jingïakhun ha ka Premier League naduh ba u la sdang ban ïalehkai, hynrei u Manager u la ong ba un sa wad ïa ka lad ban weng ïa kane ka jingeh haba ym don ma u.
Ka City ka la shah rem ha ki saw sien na ki san sien ïakhun ha ka por ba u Rodri u la duh ïalehkai ha ka aïom ba la lah, katba ka la shah rem tang shisien ha ki 50 tylli ki jingïalehkai jong baroh ki lympung ïalehkai.
U la shah jied ruh ïa ka nam ‘player of the tournament’ ha kaba ka Spain ka la khur jingjop ha ka Euro 2024 ha u Naitung bad u la long uwei na ki rangïalehkai ba kynsai na ka bynta ban ïohpdiang ïa ka khusnam Ballon d’Or ha u bnai ban wan.
