Shillong, Nailur 25
Ka Umpling SC bad ka Tynring SC ki la long sa kiwei pat ki kynhun kiba la lah ban pyntikna na ka bynta ban jam sha ka semi final ha ka lympung ïalehkai Third Divi -sion Football League 2024 ba la pynïaid da ka Shillong Sports Asso-ciation, hadien ba ki la ïoh jingjop ha ka Sngi Balang ha SSA Stadium kaba ha Polo.
Ha kane ka jingïakhun quarter final ka Umpling SC ka la lah ban pynliem noh ïa ka Sanmer SC lyngba ka tie-breaker da 4-2 kol.
Naduh kaba sdang kine ki kynhun ki la pyrshang ban ïakhun tyngeh bad haduh kaba kut ki la ïakhaid mar 2-2 kol. Ka Sanmer ka la ïoh ban pynkhih jar nyngkong eh lyngba u Babitbor Dorphang ha ka minit kaba 26 bad kane ka shi kol ka la ïai neh haduh kaba kut jong ka kylla step.
Hadien katto katne por ba la bteng ïa ka jingïakhun jong ka kylla miet ka Umpling ka la lah ban pynïakhaid kylla lyngba u Adonay Riwan ha ka minit kaba 73. Ka Sanmer ka la ïoh ban thep ïa ka kol kaba ar jong ka lyngba u Kenny Maxwell Syiem ha ka minit kaba 87. Hadien ar minit ka Umpling ka la lah ban pynphai kylla lyngba u Larrykupar Kharnaïor na ka bynta ban ïakhaid haduh kaba kut ka jingïalehkai.
Hadien ba la rah sha ka jingïashut tie-breaker ba ka Umpling ka la lah ban pynurlong ïa ka jingjop hadien ba ka la tam da 4-2 kol ïa ka Sanmer.
Haba phai sha kawei pat ka jingïakhun kaba ar, ka Tynring ka la pynliem noh ïa ka Mawkriah West SC da 3-1 kol. Kane ka la wan urlong lyngba u Bankitlang Kharkongor uba la thep ha ka minit kaba 4, Jesleyroy M. Pdah (38) bad u Commanding Swer (43). Hynrei ka Mawkriah ka la lah ban pynphai kylla shi kol hashwa ban wai lyngba u Edrickson Warjri ha ka minit kaba 87.
Ka jingïalehkai jong ka Second Division ha ka sngi Palei kan long hapdeng ka Lumshyiap SC pyrshah ïa ka Laitlyngkot SC ha ka por 12, katba ka Marbisu SC ïa ka Nongkrem SC ha ka por 3 baje janmiet.
