
Shillong, Nailur 26
Ha ka 23 tarik mynta u bnai, kawei ka kali Alto ha kaba la kynnoh ba u nongñiah jong kane ka kali uba la don hapdeng ka jingshoh khawiang, ka la leit ban rat ïa iwei i khynnah bad ruh ban syllad sa ïa kawei ka longkmie, kiba dang ïaid lynti harud surok, kaba la jia ha ka shnong Pohkseh.
Katkum ka dur khih ba la ïohi lyngba ki kor CCTV, la sakhi ba kane ka jingjia leit tynrah ïa kitei ki briew da ka kali Alto (private) kaba don ïa u registration number ML05-W-6064 ka la jia ha ka por kumba 4 baje eiei ha katei ka sngi, ha kaba kane ka kali ka la leit ban rat ïa iwei i khynnah iba dang ïaid harud surok, haduh ba i la sied kham pajih bad mynsaw jur.
La ïoh ban sakhi ruh ba mar ïajia kane ka jingjia, kane ka kali ka la phet bak na kane ka jaka bad kham hadien katto katne por kane kajuh ka kali ka la leit ban syllad sa ïa kawei ka longkmie kaba dang ïaid lynti harud surok bad nangne ruh ka la phet bak.
Katkum ka tyllong khubor ba la ïoh lum la ong bad kynnoh ba kane ka jingjia leit tynrah jong katei ka kali ïa kitei ki briew ka dei namar ba u nongñiah u la don hapdeng ka jingbuaid kyiad. La ong ruh ba na ka liang jong ki pulit mar ïa ïoh jingtip ha katei ka sngi hi ki la ïoh ban bat noh ïa ka kali bad ïa utei u nongñiah.
Haba ïoh ban ïakren bad ki bahaïing-hasem jong une u heprit ki la ïathuh ba ïa kane ka kali la ñiah da uwei u khynnah samla ba dang 23 snem ka rta u ba don hapdeng ka jingshoh khawiang ha kaba la ïohi lyngba ka durkhih ba u la rat naphang ïa une u heprit uba dang ïaid lynti.
Na ka liang ki bahaïing-hasem ki la pyntip ruh ba ïa une u heprit la pynkynriah na Childrens’ Hospital sha Guwahati bad na ka liang ki doktor ha Guwahati ki la pyntip ba kumba ka long mynta ka jinglong-jingman jong une u heprit kam lei-lei hynrei u hap ban shu dih da ki dawai-dashin.
La ong ruh ba ki bahaïing jong une u heprit u ba lah shah tynrah, ki la weng noh ïa ka jingujor ejahar pyrshah ïa u nongñiah jpng katei ka kali hynrei la kyntu pat ïa ki bahaïing jong utei u khynnah u ba ñiah ïa katei ka kali ba ki dei ban siew ïa ka bai lutksan bad ki la kyntu ruh ïa ki pulit ba ki dei ban pynduh noh shisyndon ïa ka laisen jong utei u nongñiah kali u ba la tynrah ia une u heprit.
Na ka liang jong kiba bun ki riew paidbah ki la pynpaw ka jingsngewsih bad pynrem jur ïa utei u nongñiah kali bad kyntu ïa ka tnat pulit ba ka dei ban leh bad pynshitom da kaba tyngeh ïa kum kine ki briew bad ba dei ban pynduh shi syndon ruh ïa ka laisen ñiah kali, namar ka jingdon jong kum kine ki briew ka buh jingma kaba khraw ïa ki nongleit nongwan khamtam ïa ki khyllung khynnah.
Shuh shuh ki la ong ba kane ka dei ruh ban long ka khubor ba kum ki nongñiah kali, kim dei ban bat shuh ïa u ‘steering’ haba la shoh khawiang, namar kane kan wanrah jingma ïa ka jingshngaiñ ha ka leit ka wan ha ki surok bad ruh ba kum ki nongleit nongwan kiba ïaid ha surok ba kin phikir bha haba ïaid ba ïeng bad ruh ba haba ki btin ïa ki khyllung ne khynnah, kin btin beit na ka bynta ka liang kyndon ym na surok.