Shillong, Nailur 26
U Kishan Lyngdoh un shimti kum u kapten na ka bynta ka kynhun ïalehkai ka Jylla ha ka Ranji Trophy 2024-25, katba u Dippu Sangma kum u vice-captain, la pynbna ka Meghalaya Cricket Association ha ka Sngi Palei.
Kane ka synjuk ka la pynbna ruh ïa ki lai ngut ‘rangïalehkai (guest professional players) na ka bynta kane ka aïom ïalehkai 2024-25.
Ka Meghalaya ka la rung sha ka Elite Group mynta ka samoi hadien ba ka la lah ban ïalehkai bha ha ka Plate Group ha u snem 2023-24 ban wan ba-ar ha Hyderabad.
Ha ka 17 tarik mynta u bnai ka MCA ka la pynbna ïa ka kynhun ïalehkai kaba don 12 ngut ki rangïalehkai ba sah hapoh ka Jylla na ka bynta ar tylli ki jingïalehkai ba nyngkong jong ka Ranji Trophy ryngkat bad phra ngut ki nongïalehkai ba la pynkhreh lypa. Ïa ki kyrteng ki lai ngut ki rangïalehkai (guest professional) la pynbna mynta ka sngi.
Kumta ka jingïalehkai Ranji kaba nyngkong eh jong ka Jylla kan long pyrshah ïa ka Services shabar naduh ka 11 haduh 14 tarik u Risaw ha shwa ba kan wanphai sha la ïing ban ïakhun pyrshah ïa ka Tripura naduh ka 18 haduh 21 tarik u Risaw ha ka nongbah Shillong.
Ka jingthmu ban wanrah ïa kitei lai ngut ki ‘rangïalehkai (three guest players) ka long ban pynkhlaiñ ïa ka kynhun ha ka liang ban tied (batting). U Ajay Duhan u la ïalehkai kriket ha Haryana haduh mynta, katba u wicketkeeper-batter u Sumit Kumar u la ïalehkai na ka bynta ka Jharkhand, Bihar bad kaba dangshen u la long kum u rangïalehkai (guest player) na ka Nagaland. Katba u Anirudh B pat u la mihkhmat ïa baroh ar tylli ki jylla kata ka Tamil Nadu bad Hyderabad. Baroh ar ngut u Sumit bad u Anirudh ki don ïa ka jingshemphang ha ka jingïalehkai bad ka MCA ka khmih lynti ba kin lah ban noh synñiang shibun sha ki jingïalehkai jong ka kynhun ka Jylla.
Ka snem 2023-24 ka long ka jingjop na ka bynta u Kishan namar u la kamai 695 ron ha ki hynñiew sien ïalehkai ryngkat bad ka jinglah ban kamai ïa ki spah run napdeng ki rangïalehkai ka Jylla. U Dippu uba lah ban ïalehkai bha ha kaba u long u kawang bol uba stet bha, ha kaba u la ïoh ban khur 17 wiket bad kane ka jingtbit ka jong u ka dei naduh ba u la ïoh ban ïalehkai nyngkong ha u 2018.
Ki kyrteng ki rangïalehkai na ka bynta ka jingïalehkai ba nyngkong ha ka Ranji Trophy ki long u Aryan Borah, Akash Kumar Choudhary, Arpit Bhatewara, Bamanbha Shangpliang, Bijon Dey, Chengkam Sangma, Dippu Sangma (V-C), Jaskirat Singh Sachdeva, Kishan Lyngdoh (C), Ram Gurung, Roshan Warbah, Swarajeet Das, Ajay Duhan, Sumit Kumar bad u Anirudh B. Kiwei pat kiba la pynap lypa ki long u Adarsh Joshi, Anish Charak, Lerry G Sangma, Shembhalang Pyngrope bad u Yogesh Tiwari.
Ki coach ki long u Prabhakar Bairgond (head coach), Moisten Ch Marak (assistant coach), Surojit Biswas (physio), Vikash Singh Chauhan (trainer) bad Bah Dister Marbaniang (manager).
