Washington, Nailur:
U Secretary of State jong ka US- u Antony Blinken, u la pynbna ba ka US ha ka Sngi Balang ka la pyllait ia ka song jingïarap kaba $375 Million na ka bynta ka tnat shipai jong ka Ukraine ba kan ioh pynbit-pynbiang bad pynkhlaiñ ialade hapdeng ka jingiakhun thma pyrshah ia ka Russia.
U la ong ruh ba ka United States ka kwah ban ai jingkyrshan ia ka Ukraine khnang ba kan lah ban ialeh pyrshah ia ki kam thombor ba shyrkhei jong ka Russia. Nalor kane u la ong ruh ba ka Russia kaba long ka ri kaba heh bad kaba la bit-biang bha, ka la leit thombor dusmon ia ki ri barit kum ka Ukraine, ka bym pat kot bor eiei ban ïakhun pyrshah ia ka Russia wat la ka don ki shipai kiba tbit ne kiba biang katno-katno ruh namar ka Russia ka dei ka ri kaba la heh bha. Kumta ka Ukriane ka donkam ia ka jingkyrshan jong ki ri marjan khnang ba kan lah ban ialeh pyrshah ia ki shipai jong ka Russia kaba thmu ban ioh knieh bad kurup ei ia ki bynta jong ka Ukraine da kaba leit hiar thma kynsan ia ka Ukraine ha ka por bym poi pyrkhat.
Kumba la iohi baroh shi katta ka US ka ju ai jingkyrshan na ka por sha ka por ia ka Ukraine namar ka shim ba ka jingleit hiar thma jong ka Russia ia ka Ukraine ka long kaba bakla bad ka long ruh kum ka jingleit thombor jong ki lehnoh. Namar kata, ka US ka la ialeh ban ai jingkyrshan ia ka Ukraine khnang ba kan lah ban iakhun pyrshah ia ki shipai ka Russia, hapdeng ka jingiada jong ka Ukraine ia u pud – u sam jong ka baroh bad khnang ba ka Russia kan ym lah ban knieh ne leit kam trai ia ki bynta kiba dei hok ki jong ka Ukrain naduh kaba sdang.
