Shillong, Nailur 26
Ka long ka jingkmen kaba khraw ïa ka kynhun ïalehkai Under-17 jong ka Myngken Christian Higher Secondary School namar ka la shah khot sngewbha ban leit sha Paris na ka bynta ka Indo-French Football Tournament (IFFT) kaba la thmu ban pynlong ha u Naiwieng mynta u snem.
Ïa kane la pynpaw da u Myntri Rangbah ka Jylla u Conrad K. Sangma ha ka ‘twitter’ kaba la tip pat mynta da ka ‘X’ ha ka Sngi Palei ha kaba u la ai khublei ïa kane ka kynhun halor katei ka jingshah khot snewbha ban leit shim bynta.
Kum ban pynkynmaw, ka Mengken ka la long ka kynhun kaba tbit ha ka rukom ïalehkai ha kaba ka la lah ban jop naduh kaba sdang jong ka lympung ïalehkai Subroto Cup International Football Tournament 2024 kaba dang kut shen ha nongbah Delhi. Pynban kane ka kynhun kaba na Bhoirymbong ka la shah rem noh ha ka jingïakhun final ha ka T.G English School kaba na Manipur lyngba ka jingïashut tie-breaker da 4-3 kol.
Ka long kaba sngewtynnad ruh ba uwei na ki ‘rangïalehkai u Banpliebok Khongjoh uba la ïohpdiang ïa ka nam Best Player, u la shah jied ban leit shah pyntbit sha ki shlem ai jinghikai phutbol jong ka ri India kiba don ha Germany bad Austria.
Haba pyrshang ban ïakren bad u District Sports Officer (DSO) ka Ri Bhoi District u Bah Bobby L. Nongbet u la ïathuh, “Ka jingshah jied ka skul Myngken ka dei lyngba ka jingïalehkai bha ha ka Subroto Cup International Football Tournament 2024 kaba la kut dangshen. Ha ka jingshisha dei tang ka hynhun ïalehkai kaba rah ïa ka nam lahduh ka ban ïoh leit, hynrei ngi long kiba donbok namar ki bor pynïaid ka Subroto Mukerjee Sports Education Society (SMSES) ki la itynnad palat ïa ka rukom ïalehkai ki khynnah Under-17 jong ka Myng-ken naduh kaba sdang kane ka lympung. Kumta ka la kynthup lang bad ka T.G English School kaba na Manipur kaba long ka lahduh.”
U la pynpaw ba kat kum ka jingshah khot sngewbha, la sngewthuh ba kin don katto-katne ki kynhun ïalehkai na France ki ban ïashim bynta lang ha katei ka Indo-French Football Tournament, kaba la thmu ban sdang naduh 25-30 tarik u Naiwieng mynta u snem.
“Te kumta ngi donkam ban pynkhreh bha ïa ka kynhun namar ngi dang don por sa kumba ar bnai eiei. Ïa mynta ngin hap ban pynbiang ïa ki kot ki sla na ka bynta baroh ki khynnah ïalehkai kynthup lang ïa ki coach bad ki nongïalam ïa kane ka kynhun.”
