Shillong, Nailur 27
U MLA ka South Shillong konstitwensi, Bah Sanbor Shullai, u la bthah ïa kiba sah ha u pud u sam ka Shillong Cantonment Board ki bym dei ki nongshong shnong ka Jylla kin pynshisha ïalade bad dei ban don ki kot ki sla na ka Jylla kaba ki wan bad lada kim don, yn nym shah ba kin shong kin sah namar ka don ka jingma namar ka jingwan kiba wan rung beaiñ kaba long ka jingma ïa ka imlang sahlang bad ka ri.
Ha ka shithi sha u Chief Executive Officer (CEO) ka Shillong Cantonment Board, Shillong, u Bah Sanbor u la kdew ruh halor ka jingjia ba shahkem ka snar nongkhaïi drok ka Aisha Khatoon kaba na Lower Paltan Bazar hapoh Shillong Canton-ment kaba la long ka daw ban mih jingeh ha kane ka jaka ha kine ki bun snem ba la leit.
Kumta u Bah Sanbor u la ong ba kan don ka jingïakynduh lang bad ki pulit lem bad kiwei pat ki nongdon bynta naduh kito kiba bat ïa ki kot wai jaka ha Shillong Cantonment Board ha Jhalupara Community Hall ha ka 2 tarik Risaw, 2024 ha ka por 12 baje shiteng sngi.
U Bah Sanbor u la ong ba u Myntri Korbar ri ka Sorkar Pdeng u Amit Shah u la dep pynpaw ba dei ban leh tyngeh ïa kiba khaïi drok bad kiba shu wan beaiñ. Kumta u la ong ba kito kiba long ki nongwai ïa ka Lower Paltan Bazaar ki dei ban tip ïa kane, bad lada kim wan sha ka jingïalang dei ban leh da kaba tyngeh pyrshah ïa ki.
“Kito ki trai kiba ai jaka rieh ïa ki ‘riew runar dei ban pynngat katkum ka aiñ,” la ong u Bah Sanbor uba la kyntu ban shimkhia ban pynbeit ïa kane ka jingïalang ha katei ka sngi.
