Jerusalem, Nailur:
Ka tnat shipai Israel ha ka Sngi Thohdieng ka la iathuh ba ka la ioh ban siat pynbthei ia uwei u ‘namding uba la wan poi na Yemen hadien ba ki la iohsngew ia ka jingriew ‘Siren’ bad ka jingbthei kaba sawa jam ha ka step Sngi Thohdieng.
Kumta, la ong ba tang mar ia iohsngew ia ka jing-riew ki siren ha katei ka step, ki bor pahara ka Israel ki la peit-thuh bad ki la iohi ia utei u ‘namding uba wan poi na Yemen bad uba thmu ban leit bthei sha ki bynta khappud jong ka Israel bad kumta ki la trei shitom ban tehlakam ia utei u ‘namding shuwa ba un hap bad bthei sha sla khyndew.
Ia mynta hi, la ong ba ka tnat ïada jong ka Israel kam shym iohi ban don kano-kano ka jingma kaba dang ap ia ka Israel na kitei ki lehnoh Houthi jong ka Yemen, lada dei shisha ba utei u ‘namding u wan poi na ki lehnoh ka Yemen.
Namar la ong ba naduh ka 7 tarik jong u Risaw, ba ka Israel ka la leit ban pynhiar kput ia ki lehnoh Hamas halor ka jingleit hiar thma ia ka Israel ha u snem ba la dep, la ong ba kitei ki lehnoh Houthi jong ka Yemen ki la sdang ban pyni ia ki kam thombor pyrshah ia kino-kino ki ri kiba leit ïaid lyngba ne leit tur sha bynta kiba marjan bad ka Yemen, ha kaba ka US bad Britain la ar-lai sien ki la ther bom kylla sha Yemen ban pynphai kylliang ia ka jingleh jong kitei ki lehnoh, kaba la khanglad ia ki kam- ki jam jong ki ri bapher-bapher kiba dei ban ïaid lyngba ia ka bynta jong ka duriaw kaba marjan bad ka Yemen.
Ha u Naitung, la iohi ba ki lehnoh Houthi ki la phah ia kawei ka drone ban leit thombor sha Israel ha ka sien kaba nyngkong eh kaba pynlong ia uwei u briew ba un khlad hashen bad kumba 4 ngut pat ki la mynsaw ha katei ka jingjia. Kumjuh ruh na ka liang ka Israel ka la leit ban kput ia ki ktem treikam jong kitei ki lehnoh kiba don hajan jong ka Hodeidah kaba pynlong ia 6 ngut ki dkhot jong katei ka kynhun lehnoh ban kyllon iap bad kumba 80 ngut pat ki la mynsaw ha katei ka jingjia.
