Guwahati, Nailur:
Ka sorkar kmie ka la nang pynjlan ha kaba ïadei bad ka jingpyntreikam ïa ka Armed Forces (Special Powers) Act (AFSPA) ha ki phra tylli distrik kiba don ha Nagaland bad lai tylli distrik kiba don ha Arunachal Pradesh hadien ba la bishar bniah ïa ka jinglong jingman ha kaba ïadei bad ka shongsuk- shongsaiñ ha kine ar tylli ki jylla jong ka thaiñ ba Shatei-lam-Mihngi.
Ïa kawei ka jaka ne distrik la pyntip ba ka long kum kawei na ki jaka ba la shah ktah ha kaba ka la hap hapoh ka AFSPA khnang ban pynsuk ïa ka jingtreikam jong ki shipai.
Ka AFSPA ka ailad ïa ki shipai kiba treikam ha ki jaka ba la don ki jingbym shongshngaiñ ha kaba ki la don ki jingleit khynra, ki jingleit kem briew bad ban leit siat lada donkam khnang ban lah ban pynneh ïa ka shongsuk-shongsaiñ jong ki paidbah.
Ha ka jingpynbna ba la pynmih ha ka janmiet jong ka Sngi Balang, ka tnat ki kam pohïing jong ka sorkar kmie ka la ong ba ka sorkar kmie ha kaba pyndonkam ïa ka bor ba la ai da ka Section 3 jong ka Armed Forces (Special Powers) Act, 1958 (28 of 1958) ka la pynbna ïa ki 8 tylli ki distrik, bad 21 tylli ki jaka treikam jong ki pulit kiba don ha ki san tylli kiwei pat ki distrik jong ka Nagaland kum ki jaka ba la ngat ha ki jingeh bad shah pynthut na ka bynta hynriew bnai ha kaba ka la sdang ïa kane naduh ka 1 tarik, Ïaïong, 2024.
Ka tnat ki kam pohïing shuh shuh ka la ong ba la shim ïa ka jingbishar bniah halor ki jinglong jingman ha kaba ïadei bad ka synshar-khadar ha Nagaland.
