U Nongsaiñ Hima, 1990
La jan baroh ki Ri bakhraw ka pyrthei kiba la kiew ha ka ioh ka kot ka saian bad technology, ki sdang shuwa ban pynkhraw ïaka rep ka riang.
Lada shim nuksa kiba biang ka pyrthei ka ioh jingmut naka jingkiew ha ka bor bad burom jong ka Amerika kaba lah nyngkong eh ban pynbiang ka rep ka pyndap bam ïa ki paidbah jong ka lyngba ka rukom sam ïa ki jaka rep (land Distribution), ka jingpynbiang ïa ki nongrep ïa ki jingdonkam katkum ka jingïaid ka por bad ka jingpynshlur ban pynmih ïa ki mar rep kiba ïaid ïew. Ka long kaba shisha ba ka bam ka dei kaba donkam eh ïa baroh khnang ba ki paidbah kin lah ban pynroi ïalade ha kiwei pat ki bynta, kaba donkam ha ka imlang sahlang.
Don kiba ong ba ki nongrep ki dei ka mluh ong ka pyrthei, kane ka jingong ka don ka jingshisha namar, khlem ki nongrep kiba smat ban pynmih ia ki jaid jingthung ba bun jaid ka kmie kaba leit siew ha ïew ha hat kan shem shitom ban pynbiang hala ïing ïa ki jaid jingbam kiba tei ïa ka met briew. Naduh ba dang khynnah donkam ïaki jingbam ba tei khnang ba ka jabieng ka long kaba proh. Lada shu ong ka biang, hynrei bunsien ngi klet ïa kito kiba pynmih ïa ka syep ka syar, ka buit ka bor ban pynbiang ïaki jhur ha iew na ka bynta u paidbah. Hynrei, bunsien ki nongrep ki ju shah kñiot haka dor ka mur bad kumjuh ruh u nongthied u ud ïa ka jingrem ka dor ka mur haba leit siew ha ïew.
Ka donkam namarkata, ka jingïatrei la ngi ban pynim ïa ki nongrep khnang ba kin ioh mynsiem ban pynkhlaiñ ïaka rep bad ba kin nang pynïar ïaka sha kiwei pat ki bynta jong ka rukom rep bad bunjaid ki jait jingthung. Kumjuh ki nongkhaiï ki dei ban sngewthuh ba ka jingiohnong jong ki kam dei ban ktah ïa u paidbah, namar, ka jinglah u paidbah ban siew ha ïew ka long ka lynti ka jingroi lang baroh ym, ba kan don ka jingmyntoi tang ha ka shimet lane tang ha ki khyndiat ngut.
Hapdeng ba ong ha donkam ban pynïeng ïaka rep ka polisi jong ka sorkar ruh ka dei ban long kaba biang na ka bynta ki nongrep ym ban shu shna ïa ki skim bad plan ki bym ïadei bad ki bad ka bym lah ban pyntreikam. Katno la lehnohei ka tyngka sorkar haba jia kumne. Wat katta ruh ki don ki skim kiba biang ïa ki paid nongrep hynrei tang khyndiat ngut kiba ioh ban shim kabu ïaki, na kano ma kano ka daw.
ïa ka bor ban rai halor ka rep ka riang dei ban don ki riew shemphang halor jong ka ki lah ban leh ia kata kaba donkam ym ban aiti ïa ka rai treikam ha ki briew ki bym pat ju ktah ïa ka rep mynno mynno ruh. Ki lait ki let namarba bym don jingtip kiba biang shaphang ki jaka rep ka ktah shibun ïaka ioh ka kot ki nongrep. Ym tang kumta ka ktah ruh ïa ka jinglong ka khyndew ka mariang. Namarkata, ban pynïeng ïa ka rep ka donkam ka jingsngewthuhn kaba jngai ïa ki jingdonkam baroh khnang, ba ki jingpyrshang, kin nym long lehnohei. U ne u dei mawjam banyngkong ba ka Ri jong ngi kan kiew ha ka ioh ka kot bad ka ban pynlah ba ngin beh sha ka kyrdan jong ki Ri na Sepngi.
