Guwahati, Nailur:
U Myntri Rangbah ka Assam u Himanta Biswa Sarma ha ka sngi palei u la ong ba ka seng BJP ka la dep ban pynurlong ïa ka jingkular jong ka ha ka por ba don ilekshon ban pynïoh kam sorkar haduh shi lak ngut ha ka jylla. U la kren ïa kine ki kyntien ha ka jingïalang hadien ba la sam ïa ki shithi thung kam sha 300 ngut ki nongwad kam ba dang shu thung thymmai. “Ym tang kane ka jingkular ba ka sorkar jylla ka la lah ban pyndep, hynrei ngi la lah ruh ban leh kham palat ïa kane, da kaba pynrung sa 24,645 ngut ki nongwad kam,” ong u Sarma. U la ong ba ka por kan sa poi ba ki samla pule Engineering ha Assam kin ym ïoh shuh ka kam ha kaba kane kan sa pynlong ïa ki ba kin hap ban wad shabar jong ka jylla. “Hynrei ha kine ki lai snem ba la dep, la thung kam ïa shibun bha ki Engineer ha kylleng ha ki tnat bapher bapher, kiba kynthup ha ki Public work, Public Health Engineering bad Rural Development,” u la ong.
U Myntri Rangbah u la pynshong nongrim ha ka jingnang bun ha ka jingpynrung kam bad ka jingkiew ha ka jingpynlut pisa jong ka jylla, kaba la thaw lad ïa ki Engineer ban noh synñiang sha ki projek ba kham kongsan. Kawei na kum kine ki jingthmu ba la buh ka dei ka Jal Jeevan Mission (JJM), kaba thmu ban pynpoi ïa ka umdih kaba khuid sha man la ki shnong bad ki ïing lyngba ki tyndong pynpoi um, u la ong.
U Myntri Rangbah u la kren ruh shaphang ka Semiconductor Plat ha Jagiroad, ha kaba u la kyntu ïa ki samla ka Assam ba kin shim ïa ki lad ki lynti ki ban sa wanrah. U la kam ba ka jingpynrung kam kaba dang shen ka la long kaba pura katkum ka jinglah ka sorkar, kaba pynneh ïa ka jinglong kaba shai bad paw paidbah ha baroh ki jingtreikam. U Sarma u la kyntu ïa ki ophisar kiba dang shu thung thymmai ba kin trei da ka jingaiti lut na ka bynta ka roi ka par jong ka jylla. U la pynpaw ïa ka jingthmu jong ka sorkar ban pynkhlaiñ ïa ki rukom wan bniah ha ka jingstad saïan, da kaba kdew ïa ka jingkiew jong ka jingdon jong kiba shah rai pynrem bad ki jingshah pynngat ha ki kyndon aiñ ha kine ki snem ba la dep.
Ka sorkar jylla ka la pynbun ïa ki Forensic Laboratory sha 6 tylli, katba ki jingthmu ki dang ïaid shakhmat ban seng ïa ka National University of Forensic Science, u la ong. Napdeng kiba la ïoh ïa ki shithi ki long 81 ngut ki Assistant Engineer (Civil, Mechanical, Electrical, Chemical) ha ka tnat Public Health Engineering, 100 ngut ki Urban Technical Officers bad 101 ngut ki Financial Management Officers ha ka tnat Housing & Urban Affairs, ryngkat 12 ngut ki Senior Scientist bad 6 ngut ki Junior Officers ha ka tnat Directorate of Forensic Science.Da kine ki jingthung thymmai, ka jingdon jong ki nongtrei hapoh kane ka sorkar jylla kaba mynta ka la kiew sha ka 1,24,645 ngut.
