Shillong, Nailur 27
Ka Khlieh Shnong Tynrai (KST) jong ka Bri U Hynñiewtrep kum ka jingsngewkhia halor ka jingthmu jong u Jyotish Peethad-heeshwarandah (JPSA) ban pynlong ïa ka Gau Dhwaj Sthapana Bharat Yatra ha Shillong ha ka 2 tarik u Risaw 2024 ka la thoh shithi sha ka Deputy Commissioner East Khasi Hills ban kyrpad ïa ka ban ym ai jingbit ïa katei ka seng ban pynlong ïa katei ka rally ha Shillong.
Ha ka shithi ba la thoh sha ka DC ka la pynpaw ba kum kawei na ki Synjuk ka bym don jingïadei bad kano-kano ruh ka seng saiñ pyrthei lane ka niam bad kaba burom ïa baroh ki niam, ki kolshor bad ki jingngeit kiba don ha ka Jylla bad ka Jaitbynriew, bad ngi pynneh pynsah ïa ka Ka Riti Synshar jong ka ri India ha ka jingburom kaba khraw.
Naduh ba la ïoh jingtip halor katei ka jingthmu jong u JPSA ban pynlong ïa ka Gau Dhwaj Sthapana Bharat Yatra ha Shillong ha ka 2 tarik u Risaw 2024, ka synjuk ka sngew ba wat la kane ka jingthmu ka lah ban long kaba donburom na ka bynta katto-katne ki jingngeit niam hynrei ka jingpyrkhat ban don kum kane ka jingïalang ha ka jylla Meghalaya khamtam bad ha ka thaiñ Shatei Lam Mihngi kam long kaba shongnia.
Naduh ki por shuwa ba ka India kan ïoh ïa ka jinglaitluid, ki briew ka Meghalaya kumba long lang ha kiwei pat ki jylla ka thaiñ Shatei Lam Mihngi ki la im bad ki kolshor bad ki riti ki dustur, ki jingbam bad ki jingbam ba bang kiba pher bha shibun na kiwei pat ki jaitbynriew ka ri. Ka jingbam ïa ki jait doh bapher-bapher ki long ka bynta jong ka jinglong jong ngi hi bad ka doh masi kam dei kaba kyrpang.
Kumta ka Synjuk ha kaba ïadei bad kane ka khubor ka sngew dei ban ong ba ka jingthmu jong katei ka seng ka long ka bym shong nongrim bad kaba lah ban wanrah ïa kiei-kiei kiba sngewsih.
Ka jingbam ïa ki jait doh bapher bapher ka long ka shi bynta na ka jinglong kyrpang jong ngi bad ha ngi hi ka doh masi kam don jingïapher na kiwei pat ki jait doh.
Ki jaitbynriew Hynñiewtrep ki bam kham bunsien ïa ka doh masi lait noh tang katto-katne ngut ki bym bam namar kiwei pat ki daw lait na ka jingngeit niam.
Nalor kata, ka paw ha ngi ki paidbah salonsar ba ka kynhun kaba bun paid ka thmu ban pynjari ïa ki kyndon halor jong ngi kaba ym lah ban pdiang ha kano-kano ka dor.
“Kumta kum ki nongshong shnong kiba don ka jingkitkhlieh kiba ki bor synshar ki ju khot ban don ha khmat eh haba don kino-kino ki kam ha ka Jylla ne ha Shillong, ngi kyrpad ïa phi da ka jingsngewrit kaba khraw ba phin ym ai jingbit ïa ka kynhun ba la kdew haneng ban pynlong ïa kum kane ka jingïalang na ka bynta ka jingbha jong ka baroh”, la pynkut ka Synjuk ha ka shithi.
Ka la ong ruh ba kane ka jingkyrpad ka long kaba kham kongsan shuh shuh hadien ba u Myntri Rangbah ka jylla Meghalaya u la pynpaw paidbah ba kata ka kam ka dei ban peit da ki bor synshar District.
