
Nongpoh, Nailur 29
Kum shi bynta ban pynïar ïa ka jylli treikam na ka bynta ban ai ïa ka jingshakri kaba paka tam sha ki paidbah, ka Federation of Khasi Jaiñtia & Garo People (FKJGP) ka la pynkha sa ïa kawei ka shnat treikam kaba la tip kum ka Umden Umbathiang Unit.
Ïa ki nongïalam ba thymmai jong kane ka shnat treikam la wan ban pynskhem da u Bah Dundee Cliff Khongsit, President ka FKJGP Sengkmie ha ka jingïadon ryngkat lang ki nongïalam ka North Khasi Hills District ba kynthup ïa u Bah Luistar Lyngdoh, President, u Bah Shanlang Diengdoh, General Secretary, u Bah Ricky Majaw, Organising Secretary, u Bah Tarden Nongsiej, Rangbah Shnong ka Umden Umbathiang lem bad kiwei kiwei.
Haba ai jingkren ha kane ka sngi ïa ki nongïalam bad nongkitkam ba thymmai katei ka Unit, u Bah Dundee Cliff Khongsit u la ong, ban shakri ïa ka imlang ka sahlang, donkam shwa ban don ïa ka jingkithlieh na rympei, kata ban peit ïa ka ïing ka sem, ka shnong ka thaw bad kumta ter ter.
U Bah Dundee u la pynkynmaw ruh ïa ka jingïaid lynti jong ka seng naduh ba la suit la shor ïa ka ha ka 4 tarik jong u bnai Risaw, 1989 da ki nongïalam kiba ïohi jngai da kaba kynthup lang ruh ïa ka ri lum Garo da kawei ka thong ban wanrah ïa ka jingtylli, ka jingkylla ha ka jylla ha baroh ki liang jong ka roi ka par.
U la ai ruh ka jingkyntu ïa kitei ki nongïalam bad dkhot ba thymmai ka seng, kumba ki la shimti ïa kane ka lyngkor, ki dei ban long kiba skhem ha ka jingmut jingpyrkhat bad ban shakri ïa ka jaidbynriew khlem ka jingtieng jingsmiej bad ba kim dei ban shim ïa ka kyrteng jong ka seng tang ban myntoi shimet hynrei ba kin ai ïa ka jingshakri kaba hok na ka bynta ka jingeh jong ki paidbah bad ki nongshong shnong ka thaiñ khamtam ban rad dyngkhong ïa ki jingpang kiba sdang bam duh ïa ka jaidbynriew kum u drok, ka jingrung kyrthep ki mynder bad shibun kiwei kiwei de ki mat ki jura kiba kum ka seng ka ju ïai shim na ka por sha ka por.
Ki nongïalam bad dkhot ba thymmai jong kane ka shnat kiba la shah pynskhem ha kane ka sngi ki kynthup ïa u Bah Rubi Sohshen, President, Bah Tarden Nongsiej, Vice President, Bah Jylliew Rympei, General Secretary, Bah Dathewjanai Rympei, Organizing Secretary, Bah Raikutlang Ronghang, Education Secretary nalor kiwei kiwei ki dkhot jong ka Executive Committee.