Guwahati, Nailur:
Ka Kuki Inpi, kaba dei ka kynhun kaba heh jong ka jaitbynriew Kuki ha Manipur, ka la pynrem ïa ki jingkren dang shen ba la pynmih da u nongai jingmut jong ka tnad ïada ri, u Kuldiep Singh, da kaba dawa ïa ka jingpanmap paidbah, na ka bynta kaei kaba ka la batai kum ki jingkren “ki bym don jingkitkhlieh bad kiba don jingma”.
Ha ka jingpyllait khubor ba la pynmih ha ka sngi Palei, ka Kuki Inpi ka la pynpaw ïa ka jingsngewkhia halor ka jingkren jong u Singh ha ka jingïalang bad ki nongthoh khubor ha ka 20 tarik u Nailur, ha kaba u la kam ba ki don 900 ngut ki ehrang Kuki na Myanmar kiba la ïaid lyngba u pud u sam ban hiar thma ïa ki nongshong shnong Meitei.
U Singh u la pynbna ba ka jingtip ka long kaba “shisha 100%,” kaba la pynlong ïa ka jingtieng bad jingeh kaba la nang jur ha ka thaiñ kaba la don lypa ka jingkylla. Ki Kuki Inpi ki la ther tyngeh ïa u Singh halor ka jingpynsaphriang ïa ki jingtip ki bym pat lah ban pynshisha, kaba ki la ong ba ka la nang pynjur shuh shuh ïa ka jingkulmar kaba dang ïai bteng mynta ha Manipur.
“Kum kine ki jingkren khlem nongrim, khlem ka jingpynshisha kaba biang, ki la pynjur shuh shuh ïa ka jingïakynad bad ki jingmih jingkulmar nalor ba la don lypa ha ka jylla,” la ong ka tyllong khubor.
Na ka bynta jong ki, ka jinglong jingman ka la kylla haba, tang ha ki san sngi hadien, ha ka 25 tarik u Nailur, u Kuldiep Singh, ryngkat bad u DGP ka Jylla, u Rajiv Singh, u la kam ha ka jingpynbna ha ki lad pathai khubor kaba ong ba hadien ba ïa ka Intel ym shym la lah ban pynshisha ha kaba ïadei bad kane ka bynta.
Ki heh sorkar ki la kdew ruh ba kam don “ka daw ban ngeit” ïa ki jingtip ba la pynskhem mynshwa ba la pynshisha 100%, kaba pyni ïa ka jingpyrshah kaba jur ïa ki jingkynnoh jong ki kiba la pynshisha hashwa. Ka Kuki Inpi ka la khot ïa kane ka jingpynkylla kum ka “jingpynkylla kaba paw pyrthei,” da kaba kynnoh ïa u Singh ba u pyni ïa ka jingbym don ka jingtbit bad pynpaw ïa ki jingma kiba lah ban mih na ka jingpynphriang ïa ki jingtip kiba bakla.
“Ka long ha baroh ar, kata kaba sngewsih bad kaba buh jingma haduh katta katta ba u heh ophisar kum u Kuldiep Singh u la ailad ïalade ban long tang u nongkren ïa u Myntri Rangbah ka Jylla u Biren Singh, uba la long u nonghukum sha lyndet ha ka ban pynïap briew kaba dang ïaid shakhmat pyrshah ïa ka jaidbynriew Kuki,” la bynrap ka tyllong khubor.
Ka kynhun ba hakhliehduh ka la kynnoh shuh shuh ïa u Singh ba u long u tyngshop ha ka jingthmu saiñ hima sima kaba thmu ban pynthut bad pynduh jait ïa ka jaitbynriew Kuki.
Ka Kuki Inpi ka la dawa na u Singh ban pynpaw pyrthei ïa ka jingpanmap paidbah na ka bynta ki kam jong u bad kyntu ïa u ban pyndep ïala ka kamram khlem thew shiliang, khlem da ngop ha ka jingpynbor jong ka kam saiñ pyrthei.
“Lada um lah ban bat ïa ka jinglong ba janai kaba la dawa na ka ophis jong u, kan long kaba bha tam ïa u paidbah ba un kynriah noh bad ailad ïa u ophisar uba kham dei hok bad uba tbit ban shimti ïa ka jaka jong u, ngi la kyntu ruh ïa u ba un nym pynsaphriang biang ïa ki khubor ki bym lah ban pynshisha, lane ka Intel kaba lah ban pynmih ïa ka jingïakynad kaba ym da donkam ne tang na i daw barit, lada ym lah ban leh kumta ki Kuki kin hap ban shim ïa ki lad ki lynti kiba donkam ban pynthikna ïa ka jingshah weng noh jong u na ka kyrdan jong u,” la bynrap biang u Kuki Inpi.
