Shillong, Nailur 29
Ka Joint Action Committee (JAC) Sports Club Mawlali ha ka Sngi Thohdieng ka 27 tarik u Nailur 2024, ka lah ïoh ban pynkup burom da ka 2nd Maitshaphrang Award ïa ki khynnah kiba pass bha ha ki eksam bapher-bapher jong ka shnong Mawlali hapoh ka jingïalam jong u Bah Banteibor Kharbihkhiew kum u Secretary ha ryngkat ki dkhot jong ka JAC Sports Club Mawlali.
Ha katei ka sngi la ïadonlang da u President jong ka Khasi Students’ Union (KSU) Mawlali Unit kum u kongsan, ki kmie ki kpa bad ki khynnah skul.
La ïoh ruh ïa ki jingpynbyrngia da ki jingshad na ki khynnah skul jong ka Mawlali Presbyterian School.
Haba ai jingkren ha katei ka sngi kum u kongsan, na ka liang u President ka KSU Mawlali Unit, u la ong ba ka jingong ba kam da donkam eh ban buh skul ïa ki khun ki kti namar wat ynda la pyndep ïa ki kyrdan jingpule kiba kham shajrong ruh hynrei ym ïoh kam-ïoh jam ka long kaba bakla namar ka jingnang-jingstad ka long kaba donkam haduh katta-katta.
U la ong ba wat la ban ïoh ïa ka kam Sorkar ka long kaba jwat haduh katta-katta hynrei kaba kongsan eh ka long ban long ki briew kiba nang ban pyndonkam ïa ka jabieng namar ka kam-ka jam ka bun bad ban sdang da ki kam lade ruh, ka donkam ïa ka jingnang-jingstad.
“Kum ki kmie ki kpa ruh kim dei ban pynduh mynsiem ïa ki khun ki kti ban leit skul hynrei ka long kaba donkam ban ai mynsiem ïa ki namar lashai-lashisngi lada phim ïoh kam ruh ïalade, ki khun-ki kti pat ki donkam ïa ka jingnang-jingstad bad ïa ka jinghikai jong phi”, ong u President ka KSU.
Utei u nongïalam u la kyntu ruh ïa ki samla pule jong katei ka skul ba lada ki mih noh napoh ka shnong ruh ban leit sha sor kim dei ban ngop ha kino-kino ki jingdih pynbuaid la ka long ki kynthei ne shynrang bad ong ba kum ki samla lada kim ïoh kam Sorkar ruh kim dei satia ban duh jingkyrmen ha ka jingim da kaba leh bad ngop noh ha kino-kino ki kam sniew kiba har-rukom.
