Ka jingdon jong ki surok hi ka long ka jingpynsuk kaba khraw ha ka leit ka wan jong manla iwei-pa-iwei nongshong shnong ban leit sha ki jaka kaba ki thmu bad pyndep ïa la ki kam ki jam. Ym tang ha ki kam ki jam, hynrei ka jingdon ki surok ka la kyntiew ruh ïa ki shnong ki thaw ha ka roi ka par bad ka ïoh ka kot khamtam kito ki jaka ba kyrhai ki jaka jngohkai pyrthei kaba la khring ïa ki nongshong kai na kylleng ki jaka jong ka pyrthei. Katba nang ïaid ki por bad ki snem, ka jingmih jong ki surok ruh ka la nang bun bad wat ki lad ban rung ban mih ruh ki la nang bun. Kane ym tang ba ka la pynaram ha ka leit ka wan, ka la plie lad ruh ïa kito kiba kyrkieh kam ban lait na ka jingshong hajuh na ka dheng kali ha kino kino ki bynta jong ka surok.
Ka jingmih bun jong ki lad bad ki surok khamtam ha nongbah Shillong bad ki shnong ba kham heh ka dei ruh namar ka jingnang bun ka jingmih jong ki kali ba kynthup naduh ki ar shaka bad ki saw shaka ha ki surok. Wat la ki surok bad ki lad ki dang bun, hynrei ka jingheh jong ki surok ka long beit kumjuh naduh ba la dep shna haduh mynta bad ka jingbun ki kali, ka la long ka daw jong ka jingkhapngiah. Ym lah ban len ba ka jingdon jong ki kali ha kane ka juk kam dei shuh tang na ka bynta kiba riewspah hynrei jan baroh ki la kot bor ban thied namar ka jingpynsuk lyngba ki bank bad ka jingdon jong ka EMI (Equated Monthly Instalment), ha kaba iwei-pa-iwei nongshong ki la kot bor mynta ban thied kali ne ar shaka.
Ka kali bad ki ar shaka ki la long shisha kiba donkam bha namar ka pynsuk ha ka leit ka wan, khamtam ban leit sha ki jaka ba duna ki kali kamai. Hynrei ka jingeh pat kaba don hakhmat nalor ka jingkhapngiah, kawei ka dei ka jingbym don ka jingïa burom mar kylliang haba ñiah kali bad khamtam lei kito kiba la leh trai ïa ka surok. Ïa kane lah ban sakhi lyngba ka jingpynïeng khlem akor bad leh pathar khlem da pyrkhat ïa kiwei pat la kin lait ne em, tangba la biang ïa lade kam pher wat lada kiwei ki sohsat bad jynjar ruh. Katba nang ïaid ki por bad ki sngi, kata ka jingkwah suk ruh ka la nangjur hapdeng ki bynriew bad kane lah ban sakhi ba wat haba leit donkam tang hajan ne leit thied jingthied ruh, la sei da ki kali ki motor hynrei kaba kham wanrah jingeh, ka long ba kim salia ban ïeng beit hakhmat ki dukan ban thied jingthied ne ban pynïeng katba ki sngewmon khlem da kwah ban pynjar ne ïaid kjat khyndiat ruh.
Kane ka jingbym don shuh ïa ka burom markylliang bad ka jingleh bym suitñiew para nongñiah kali, ka dei ruh kawei na ki daw ba wanrah ïa ka jingkhapngiah bad ka jingdheng kali. Teng-teng tang na ka daw uwei hap mad jingeh bad sohsat lut kiwei pat kiba don hapdeng ka jingkyrkieh khamtam kito kiba kit nongpang ban leit rah sha ki jaka ai jingsumar ne leit shim dawai dashin. Kaba eh ha kane ka juk ba mynta ka long, nalor ka jingleh trai ïa ki surok bad ïeng katba mon, lada phi kren bad kyrpad ruh ym long, namar tang shu kren tiak, la mih ka thma ktien bad ka leh sngewmeng.
Baroh baroh ngi ud haba mih na la ki ïing ki sem ban leit sha ki jaka kiba thmu ne leit ban pyndep ïa ki kam ki jam namar ka jingjur ka dheng kali kat shaba phai. Kumta lada ngi nang ban ud, ngi dei ruh ban nang pat ban ïa burom bad bret noh sharud ïa ka mynsiem sngewsarong bad sngew trai ïa ka surok bad ban don ïa ka jingpyrkhat lem ïa kiwei bad lada lah ban sdang ïa kane, ka lah ban weng lada ym baroh ruh khyndiat ha ka leit ka wan. Ngi dei ban sdang shwa na lade ïa kane. Ynnai ïa ap ïa kiwei, long shwa kiba don mynsiem sngewrit nalade namar kan nym pynduh ne pynsngewrit ïa phi, haba phi ailad shuwa ïa kiwei ban ïaid. Kane ka jingsdang ka lah ban long ruh ka jingïarap ïa ki pulit pynïaid kali namar lada ngi nang ban ïa burom markylliang, ngin lah ruh ban weng ïa kine ki jingeh bad ki jingsohsat ha ka leit ka wan.
