Nongstoiñ, Nailur 29
Ka Hynñiewtrep Youths’ Council (HYC) Lai Lyngdoh Circle hapoh ka jingïalam u Samla Wandapynkmen Marwein, President ryngkat ka jingsynran lang u Samla Lumlang Kharsyiemlieh President HYC West Khasi Hills lem ki dkhot ha ka Sngi Saitjaiñ jong ka taïew ka la ïoh ban leit ïakynduh ïa ka Dr Tariang, DHMO ka West Khasi Hills District halor ban buddien ïa ka jingong ne jingpynbna ka Sorkar ban kyntiew ïa ka Sub-Centre Nongkynjang sha ka PHC kaba ki paidbah ki la angnud la slem ha ka thaiñ Lai Lyngdoh.
Ki Nongïalam ka HYC ki la pynpaw ba ha ka jingïakren bad ka DMHO, ka Dr Tariang ka la ong ba mynta la dep khot ‘tender’ kumba 6 klur tam la ïoh jingmang ïa ki ïing paki (building) kynthup ka PHC bad ki Quarter ki nongtrei bad hadien kata da la dep ki ïing paki kin sa mang sa ïa ki nongtrei, ong ka DHMO.
Halor kane ka bynta, na ka liang ka HYC ka la pynpaw jingsngewnguh ïa ka sorkar kaba la ïaid shakhmat bad ki jingkular.
Ka HYC ka la dawa ïa ka sorkar lyngba ka tnat ba dei peit ba ka dei ban kham pynkloi khnang ba kan pynsuk bad long jingkyrkhu ïa ki paidbah ka thaiñ, bad halor kane ka bynta ka seng kan ïai buddien na ka bynta ka jingbha ka thaiñ.
