Tura, Nailur 30
Ki lanot kiba ngat ha ka jingjia shah siat ha ka 30 tarik u Nailur bad kiba la khlad noh katba dang ïakhih halor ka jingkynnoh ïaphiah ïa ka MBOSE ha u snem 2005, la kynmaw burom ha ka Lah Sngi U Blei lyngba ka jingïalang duwai kaba la pynlong ha District Auditorium, Tura.
Ki don 9 ngut ki briew kiba la duh ei la ka jingim ha katei ka sngi hadien ba ki pulit ki la siat sha ki paidbah nongïakhih namar ki la sdang leh donbor. Katei ka jingjia kaba la jia ha kane ka sngi ha u snem 2005, ka la pynkyndit ïa ka thaiñ Garo baroh kawei bad kumjuh ïa ka Jylla hi baroh kawei.
Ki pulit ki la siat ïa ki paidbah nongïakhih ha ki ar jaka – Tura bad Williamnagar kaba la ïalam sha ka jingduh noh jong 9 ngut ki mynsiem ba kordor. Katba 4 ngut ki ‘riew lui-lui ki la shah siat ha madan ïalehkai Chandmary ha Tura, ki 5 ngut kiwei pat ki la shah pynïap ha madan ïalehkai Rongrenggre ha Williamnagar.
Naduh ba jia katei ka jingjia ba sngewsih, ka ’30th September Victims’ Solidarity Forum’ ka la pynlong ïa ka jingïalang duwai man u snem kum ka jingkynmaw burom ïa kito kiba la khlad noh.
Ha kane ka jingïalang kynmaw burom la wan ïashim bynta da ki nongïalam na ki Balang bapher-bapher, ki ‘riew rangbah nalor ki kynhun seng trei mon sngewbha bad ki kynhun samla pule. Ki nongïalam na ki kynhun seng bapher-bapher kumjuh ki ‘riew rangbah ki la ai khublei ruh ïa ki bahaïing-bahasem jong ki lanot kiba la khlad noh ha kane ka jingïalang duwai.
Hadien ka jingïalang kaba la long ha District Auditorium, ka la don ruh ka jingïaid paidbah sha ka jaka ba jia katei ka jingjia ba sngewsih ban leh burom da ki syntiew kumjuh ban thang ïa ki mombati ha u mot uba la pynïeng ban sah kynmaw ïa ki lanot jong katei ka jingjia.
Shuh shuh ïa ki sharak ding, kiba la buh thik ha jaka ha kaba uwei-pa-uwei u lanot u la kyllon, la thang da ki bahaïing-bahasem ha katei ka jaka.
