Khliehriat, Nailur 30
Ka Khliehriat East YWSC, Teilang SSC Lummyrli bad ka Moonongtdu ki la ïoh jingjop ha ka lympung ïalehkai 3rd Division Football League ba la pynïaid da ka East Jaiñtia Hills District Football Association (EJHDFA) ha ka Lah Sngi U Blei ha madan Diengshynrum.
Ha ka jingïakhun ba nyngkong, ka Khliehriat East YWSC ka la pynliem noh ïa ka Umlawang SSC da 5-0. U Silvester Shylla (11 & 17) bad u Dilung Swer (57 & 64) ki la thep mar ar kol bad ïa kawei pat la pynbud da u Ijuhpaïa Sympli (56).
Ha ka jingïakhun kaba ar, ka Teilang SSC Lummyrli ka la pynliem noh ïa ka Umrasong SCC lyngba ka shi kol ba la thep da u Markus Syngkor ha ka minit kaba 56.
Haba phai sha kawei pat ka jingïalehkai kaba khatduh, ka Moonongtdu ka la jop da 3-1 noh ïa ka Seng Khynroo SSC Umsatai. Tang mar ïasdang ka jingïakhun ka Umsatai ka la pynkhih jar nyngkng eh lyngba u Sakhiat Bareh ha ka minit kaba 5. Tang hadien ar minit ka Moonongtdu ka la pynphai kylla lyngba u Mephaski Lamurong. Kane ka kynhun ka la thep biang ïa ka kol kaba ar lyngba u Lamphrang Rasmut (20) bad ïa kawei pat la thep da u Mephaski (61) na ka bynta ban khur syndon ïa ka jingjop.
