Shillong, Nailur 30
Ka hat-trick ba la ïoh da u Arbunsing Warjri ka la biang pura ïa ka Mylliem Lum ban ïoh jingjop ha ka lympung ïalehkai SSA Second Division Football League 2024, hadien ba ka la pynliem noh ïa ka Laitlyngkot SC da 5-2 kol ha ka Lah Sngi U Blei.
Ha kane ka jingïakhun kaba la long ha SSA Stadium First Ground, Polo, u Arbunsing u la ïoh ban thep haduh lai kol kita ha ka minit 26, 34 & 88, katba ïa kiwei pat la pynbud da u Eliastar Nongsiej ha ka minit 50 bad u Lesterwel Khyriem (89). Na ka liang ka Laitlyngkot ka la lah ban pynphai kylla ar kol lyngba u Restorwell Marbaniang ha ka minit kaba 32 bad u Melambha Shabong (70)
Haba phai sha kawei pat ka jingïakhun kaba ar, ka Jongksha SC ka la jop da 6-2 kol ïa ka Pay For Right Football Academy. U Ïohbor Nonglyer (25 & 54) bad u Donbok Lyngdoh (39 & 49) ki la ïoh ban thep mar ar kol, katba ïa kiwei pat la thep da u Robert Khongjoh (63) bad u Basuklang Bina (85) na ka bynta ka Jongksha. Na ka liang ka PFR ka la lah ban pynphai kylla ar kol lyngba u Franky Shabong (45+2) bad u Malvernly Lyngkhoi (68) hashwa ba kan mad ïa ka jingshah rem.
Ka jingïakhun ha ka sngi Ba-ar kan long hapdeng ka Sohïong SC pyrshah ïa ka Laitkyrhong SC (2:45PM).
