Shillong, Nailur 30
Ka Meghalaya Football Association (MFA) ha ka Lah Sngi U Blei ka la pyllait ïa ka prokram ïalehkai na ka bynta ka lympung ïalehkai Meghalaya Youth League 2024.
Ïa kine ki jingïalehkai yn pynlong ha ka nongbah Shillong ha ka 5 bad 7 tarik u Risaw. ïa ka U-14 yn pynlong ha madan ïalehkai Third Ground jong ka MFA kaba ha Polo, katba ïa ka U-16 yn pynlong ha madan ïalehkai jong ka SAI kaba don ha NEHU. Ïa kane ka lympung ba la pynïaid da ka MFA ha ryngkat ka jingkyrshan lang da ka tnat ïalehkai jong ka sorkar jylla. Kane ka lympung ka la sakhi ïa ka jingthep kol palat 500 tylli ha 144 tylli ki jingïalehkai jong ka U-14 bad U-16 kiba la lah ban pynlong ha kylleng jong ki district jong ka Jylla.
Kumta mynta ki la don sa tang phra tylli ki kynhun ki ban ïakhun ha kane ka nongbah na ka bynta ka quarter final bad ban ïaknieh ban rah ïa ki nam lahduh.
Ha ka U-14, ka kynhun nongjop ha ka Zone-A ka dei ka Tura District Football Association kan ïakhun pyrshah ïa ka kynhun kaba wan ba-ar ha ka Zone-C kata ka Shillong Sports Association ha ka jingïakhun kaba nyngkong ka ban long ha ka 10:30 baje mynstep bad yn bud sa ka Zone-B kaba la jop ka West Jaiñtia District Sports Association pyrshah ïa ka kynhun kaba wan ba-ar ha ka Zone-D kata ka Pyndengumïong District Sports Association ha ka por 1 baje mynsngi. Katba ha ka 7 tarik, ka kynhun kaba wan ha ka kyrdan ba hakhieh jong ka Zone-C kata ka Ri-Bhoi District Sports Association kan iakhun pyrshah ïa ka kynhun ba wan ba-ar ha ka Zone-A kata ka North Garo Hills District Sports Association ha ka por 10:30 mynstep, ha kaba yn bud sa ka kynhun nongjop jong ka Zone-D kata ka Nongstoiñ District Sports Association pyrshah ïa kaba wan ba-ar ha ka Zone-B ka Amlarem Block Sports Association ha ka por 1 baje mynsngi.
Ha ka quarter-final jong ka U-16, ka kynhun nongjop jong ka Zone-A kata ka Williamnagar District Sports Association kan ïakhun pyrshah ïa ka Shillong SA ha ka por 12 baje mynsngi ha ka 5 tarik u Risaw. Nangta yn bud pat sa ka West Jaiñtia pyrshah ïa ka Pyndengumïong ha ka por 2 baje janmiet. Ha ka 7 tarik u Lber ka Ri-Bhoi kan ïakhun pyrshah ïa ka North Garo Hills ha ka por 10 baje mynstep bad bud sa ka Nongstoiñ pyrshah ïa ka Amlarem ha ka por 12:30 mynsngi. Ïa ka jingïakhun semi final yn pynlong ha ka 9 tarik bad ïa ka final yn pynlong ha ka 11 tarik u Risaw.
