Shillong, Risaw:
Ka Hynñiewtrep Integrated Territorial Organisation (HITO) ka la leit ban aiti da ka dorkhas ha ka Deputy Commissioner (DC) ka East Khasi Hills District, ka Kong R.M Kurbah ha ka 30 tarik u Nailur 2024, ban pan ïa ka jingshai ha kaba ïadei bad ka jingshna ïa ka pandal puja hapoh ka jaka jong ka ophis PWD (Buildings) kaba don ha Barik, Shillong.
Ha ka shithi ba la aiti da ka HITO Shillong City sha ka DC ka EKH ïa kaba la soi ruh da u President ka HITO sengkmie, Bah Donboklang Dkhar, ka seng ka la ong ba hadien ka jingïoh jingtip kaba tikna halor ka jingshna ïa ka pandal Puja hapoh ka jaka jong ka ophis jong ka PWD kaba don ha Barik, Shillong, kum ka seng ka kwah ban pan jingshai kumno ba ïa ka jingïalang niam ne ka jingïalang paidbah lah ai jingbit ban pynlong ïa ka jingïalang ha ka jaka sorkar.
“Ngim tip ïa kano-kano ka aiñ ne ka aiñ kaba shah ban pynlong ïa ki jingïalang paidbah ha ki jaka Sorkar. Lada don kum kine ki kyndon, ngi kyrpad ïa phi ban ai ïa ka bynta ba ïadei jong ka aiñ bad ka artikl. Hato ka tnad ba dei peit ka la ai ne em ïa ka No Objection Certificate (NOC) na ka bynta ban tei ïa ka puja pandal? Lada ka long kumta, hapoh ka bor jongno, namar katei ka jaka ka dang hap hapoh ka jingsynshar jong ka sorkar”, ong ka seng ha ka dorkhas.
U General Secretary ka HITO Shillong City, u Bah Balajied Jyrwa, u la ong ba katkum ki kyndon aiñ, ïa ki ophis treikam jong ka Sorkar ym lah ban pyndonkam kum kita ki jaka ban leh niam leh rukom ne kino-kino ki tamasa.
U Bah Jyrwa u la ong ba kum ka seng kam kynthoh ne pyrshah ïa kano-kano ka jingleh niam jong kano-kano ka kynhun niam hynrei kumba ka long kane ka paw ka jingshah shiliang bad kum ka seng ka kwah ba kan don ka jingai jingbit kaba mar katjuh ïa kiwei ruh ki kynhun bad ki riew shimet ban pynlong ia ki prokram ne ki jinglehniam ha katei ka jaka.
“Kato ka dei ka jaka treikam Sorkar bad kam ïahap ba ha ka jaka treikam Sorkar, phin buh da ki jinglehniam puja. Lada ka long kumta ruh, na ka liang jong ngi ka seng, ngi pan ba nangne shakhmat lada ka don ka jingïakhih eiei, ngi ruh ngin ïeng bad pynlong jingïakhih hapoh ka ophis PWD”, ong u Bah Jyrwa.
U Bah Jyrwa u la ïathuh namar ba ka DC kam don hapoh ka ophis treikam, kumta na ka liang ka seng kan sa leit ban ïakynduh biang ïa ka ha kawei ka sngi kata ha shwa ban sdang ka puja khnang ban ïakren halor kane ka bynta.
“Ngi sngewkhia ba lada jia kum kane ka jingjia ha ki por ban wan, ki tnad kiba don ka jingkitkhlieh ki dei ban ai ïa ka jaka na ka bynta ki jinglehniam bad ki jingïakhih jong ngi”, bynrap u Bah Jyrwa.
