Na nongbah Shillong ka dei kaba la shah jied bad shah kynthup kum kawei na ki nongbah ha ka projek ‘Smart City’ kata ha ka thup jong 100 tylli ki nongbah ka Ri ha u snem 2018 da ka Sorkar Kmie. Kane ka jingshah jied ka la wanrah ka jingkmen bad ka jingsngew sarong ba kum ki nongshong shnong kin sa ïohi ïa ki jingkylla ha ka jinglong-jingman jong ka nongbah khamtam ha kaba ïadei bad ki kor teknoloji bad ki rukom treikam kiba lah ban pynneh-pynsah. Hynrei wat la ïaid mynta la 6 snem eiei, kata naduh ba la wan ha u snem 2018, haduh mynta ym pat ïohi satia kita ki jingkylla ne ki jingpynwan dur ba paka, lait noh tang katto-katne ki ïing paki (building) kiba la dep ban tei.
Ha kine ki sngi haba ïaid sharum-shaneng ha nongbah Shillong, ki la don ki jingthoh “Welcome To Shillong Smart City” ha ki nar kiba la shna bad pynïeng kyrpang ha kylleng ki bynta jong ka nongbah. La hynriew snem tam ngi la ïaid naduh ba ka Shillong ka la shah kynthup kum kata ka ‘Smart City’ ha kaba yn hap ban pynwan dur thymmai ïa ki lynti syngkien, rukom sam umbam bad bording, bad kiwei-kiwei. Hynrei ha kine ki hynriew snem bad shwa jong kata ruh, la sakhi ba wat la pyrshang hynrei ym shym la lah satia ban weng ïa kita ki jingeh kiba hakhmat eh, kum ka jingkhapngiah bad ka dheng kali, ynnai pat ïakren ïa ka jingjaboh ne jingjakhlia kaba isaitmet ban peit haba ïaid ha ki rud surok. Ym lah sngewthuh shuh ba kumno la ong “Welcome To Shillong Smart City” namar ym pat ïohi jingkylla eiei haba ïaid ha surok syngkien, khamtam lei haba phai sha ka jinglong-jingman jong ki surok kiba kat shaba phai tang ka jingsniew bad dap satang ki thliew ki syar.
Kumba sakhi ha ka leit ka wan, ka nongbah Shillong kam dei ka ‘Smart City’ hynrei ka dang dei hi kata ka ‘Dheng City’ namar ka jingkhapngiah ka la long shaba palat liam bad ym i don lad shuh ban leh da kumwei pat ban pynkylluid ïa kane ka sor kaba la thaw khlem da don ka saiñdur. Lada ïaid da kjat ha ki jaka paidbah ruh khapngiah, lada shong da ka kali ruh khapngiah. Kane ka ‘Dheng City’ kan sa ïalam sha ki jingeh kiba nang kham pynsyrtok ïa ngi baroh. Ki kali thymmai ki mih da ki spah tylli ha ka shi sngi. Ki kali kiba wan na kiwei ki distrik ki long da ki phew hajar ha ka shi sngi. Ki kali kiba wan tuid na Assam ruh ki la nang bun. Ngi shu ïohi tang ka jingkhapngiah kat shaba phai. Lada ïaid da kjat kum ha Motphran bad Khyndailad, ka long kumjuh. U khun bynriew u la dap smam kat shaba leit. Ki ïing ki sem ruh ki ïeng mar syndah haduh ba teng-teng lada kum kren jam, kito kiba sah markhap ki la ïohsngew sa ïa ki kam ïing ki briew! Dheng kat shaba phai. Ym i don jingkyrmen shuh ba ngin ïa lait na kane ka ‘Dheng City’.
Ka jingkynthup ïa ka nongbah Shillong ha ka ‘Smart City’ ka long ban wanrah ïa ka jingkylla, kata ban wanrah bad pynbha ïa ki surok, ka jingwanrah ïa ka khuid ka suba ha ki surok syngkien, ka jingpynbiang ïa ka bording bad pynïaid ha ka rukom kaba itynnad ïa ki waiar, ka jingpynbha ïa ka koit ka khiah, ka pule dangle bad kumta ter ter. Hynrei kumba ka paw mynta, ka jingai nam ‘Smart City’ ïa ka nongbah Shillong, imat ka long tang ha ka kyrteng namar ym i don jingkylla, la phi phai ha ka liang ki surok, katba shaba phai kiba sniew suda. Wat ïa ka surok kaba la pynrung ha ka projek ‘Smart Road’ ruh la hap ban pyndam noh namar ba kam poi shano shano, kaba la wanrah pynban ïa ka jingkordit bad sohsat shibun ha ka leit ka wan, naba na ka surok rim dang ïoh ban ïaid sahuh hynrei hadien ba wan kane ka projek, la khang kdam noh syndon. Ka khuid ka suba lei kam don shuh, wat ha kjat u nar ba pynïeng ban wah ïa ka board kaba thoh “Welcome To Shillong Smart City” la dap da ka jaboh bad ka ñiut. Lada ïaid kjat nakhmat ophis DC ter ter shaduh Khyndailad, yn shem ïa ka jingbret pathar ïa ki jaboh jabaiñ ha shi lynter ka lynti ïaid kjat, kaba la pynisait met shi katdei eh. Lada tang ïa ka jingkhuid ym pat lah ban wanrah ne weng yn don jingmut aïu keiñ ban pyni sha ka pyrthei ba ngi la biang lut nadong shadong.
