Shillong, Risaw 01
Ka Laitkyrhong SC ka la ïoh jingjop ha ka lympung ïalehkai Second Division Football League 2024 ba la pynïaid da ka Shillong Sports Association hadien ba ka la pynliem noh ïa ka Sohïong SC da 2-1 kol ha ka Sngi Ba-ar ha First Ground, Polo.
Kane ka nam jop ka la wan urlong lyngba u Mebanrikupar Rynjah bad u Shngaiñlang Surong na ka bynta ban pynurlong ïa ka Laitkyrhong ban ïoh lai point.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Ka Sohïong ka la ïoh ban pynkhih jar nyngkong eh ha ka minit kaba 24 lyngba u Wanboklang Kharshilot. Hadien shiteng kynta u Mebanrikupar Rynjah (39) u la lah ban pynphai kylla na ka bynta ka Laitkyrhong.
Kane ka jingïakhaid ka la pynlong ïa kine ki kynhun ban ïakhun tyngeh, hynrei ka Laitkyrhong ka la ïoh ban thep biang sa shi kol ha ka minit kaba 43 lyngba u Shngaiñlang na ka bynta ban tam da 2-1 kol.
Watla kine ki kynhun ki la ïakhun tyngeh ha ka kylla miet, hynrei kim shym la lah shuh ban thep bad ha kaba ka Laitkyrhong ka la lah ban khur ïa ka jingjop.
Na ka liang ki bor pynïaid ka SSA ki la pynbna ba ka jingïakhun final na ka bynta ka Third Division kan long ha ka Sngi Balang ha kaba ka Mawryngkneng SC kan ïakhun pyrshah ïa ka Umpling SC ha ka por 2:30 Janmiet.
Lah ban kdew ba ka Mawryngkneng bad ka Umpling ki dei ki kynhun kiba la kiew kyrdan sha ka Second Division bad kin ïoh ban ïashim bynta naduh u snem ban wan.
